16 maj 2015

Ferqa HDPê û Hak-Parê


Kî bixebite ew qezenc dike. Apocî, PKK tim ji partî û hêzên din baştir xebitîn û lema jî bi ser ketin. Bi kêmasî sebebekî biserketina wan ev xebata wan ya bi ruh û can û bi fedekarane ye.
Ji bo hilbijartinên 7ê hezîranê wê rojê ji HDPê xanimekê telefonî min kir û ji min ray xwest.
Min jê ra got weleh ez raya xwe nadim HDPê, lê belê bi vê xebat û telefona we ez kêfxweş bûm. 
Sebebê raynedana min pirsî, min got di telefonê da sohbet zahmet e, min dîtin û sebebê xwe nivîsî ye, çima ez piştgriya HDPê nakim. Ezê raya xwe bidim Hak-Parê.
A nuha dîsa li ser navê HDPê xanimeke din telefon kir û dîsa ji min ray xwest. Min him jê ra qala telefona berê kir û him jî dîsa eynî bersîv dayê. Û min got ji bo vê xebata we ez ji we ra serketinê dixwazim.
Telefonî min tenê nekirin, min bihîst li Swêd hema hema telefonî her kurdî kirine û jê ray xwestine. Ez bi xwe vê xebata wan teqdîr dikim û hurmetê nîşan didim.
Heta nuha li ser helbijartinan û HDPê min çend nivîs nivîsîn. Min got ji ber ku HDP dibêje ew ne partiyeke kurd e û dev ji doza Kurdistanê berda ye û hin tirkên tarî kirine serokên HDPê dibê meriv piştgiriya wê neke, di vê hilbijartinê da dibê meriv raya xwe bide Hak-Parê.
Lê li gel vê beyana min ya nivîskî û li gel ku hevalên Hak-Parê yên vir min baş nas dikin jî heta nuha kesî ji Hak-Parê ne telefonî min kir û ne jî spasî min kir.
Lê HDPê du heta nuha caran telefonî min kir. Maneya xwe HDP dixebite, Hak-Par naxebite. Ev ferqekeke pir muhîm e. Dibê meriv vê rastiyê bibêje.
Yek bi şev û roj dixebite, heval ne heval telefonî her kesî dike, jê raya dixwaze.
Lê yê din li mala xwe raketiye, di xwe ra nabîne telefonî kesê herî nêzî xwe jî bike. Di xwe ra nabînin spasî kesê gotiye rayên xwe bidin Hak-Parê bikin.
Nuha helbet HDP ewê xurt bibe, bi ser keve û ev heqê wan e jî û Hak-Par jî ewê tenê çennsed rayan bigre. Ji ber ku yek bi şev û roj dixebite, fedekariyê dike û yê din jî naxebite, têra xwe fedekariyê nake.
Loma jî serketin heqê hêza xebatkar e, şaş be jî, meriv ne pê ra be jî dibê meriv vê rastiyê bibêje.
Lema, herçiqas ezê raya xwe nedimê lê dîsa jî ez ji HDPê ra serketinê dixwazim.
2015-05-15

Inga kommentarer:

Skicka en kommentar

PARVE BIKE