11 maj 2015

Li ser HDPê dibê em qet nekevin gewriya hev



Li gorî fikrê min dibê em kurd li ser piştgirî û nepiştgiriya bi HDPê ra qet bi hev nekevin û dilê hev nehêlin.
Kî raya xwe dide HDPê bira bidê û kî nadê jî bira nedê. Ez bi xwe ne raya xwe didimê û ne jî piştgiriya wê dikim. Lê neyartiya wê jî nakim.
Dibe ku hin kurd rayên xwe bidin Hak-Parê ya jî tew naçin ser sandoqê. Di tercîhek wiha da tu şaşî tuneye.Ya muhîm dibê kurd rayekê jî nedin AKPê, MHPê û CHPê.
Ji bo ku van hersê partî li Kurdistanê û ji kurdan rayan negrin çi ji destê meriv tê dibê meriv bike. Ez bi xwe tiştê ji min tê dikim.
Dijayetiya AKPê, MHPê, CHPê û partiyên tirk dibê  şêla her kurdê welatparêz ya mişterek be.
Mesela qezenckirin û neqezenckirina HDPê jî pir ne muhîm e.
Yanî dixwaze bira HDP têkeve meclîsê, dixwaze bira nekeve meclîsê zêde ferq nake û ne muhîm e jî.
Min berê jî di du sê nivîsên xwe da got, netîceya hilbijartinan ccawa be jî dewlet û AKP ewê li zirarê derkevin.
Yanî HDP têkeve meclîsê jî û nekeve meclîsê jî di netîceyê da dewletê li zirarê û kurd ewê li karê derkevin.
Ez viya li gorî tecrûbe, dîrok û rabidûya Tirkiyê û me kurdan dibêjim.
Ji roja dewleta Tirk ava bûye û virda ye ji bo ku kurdan biqedînin, bihelînin çi ji destê wan hatiye, eskerî siyasî, aborî kulturî hertişt kirine.
Zulm kirine.
Kurd terorîze kirine.
Kurd kuştine.
Bi dehzaran kurd xistine zindanan.
Bi dehhezaran surgûn kirine.
 Navê kurd û Kurdistanê yasax kirine.
Nehîştine kurd partiyên xwe ava bikin.
Navên kurdî yasax kirine.
Bi hezaran kurd, axa, şêx, beg û serokeşîr kirî ne, mecbûrî hevkariya xwe kirine.
Bi riya siyasetê û hin îdeolojiyan kurd berra hev dane, xapandine.
Welhasil ji bo ku kurdan bihelînin, doza Kurdistaneke serbixwe ji dilê kurdan derxin ev 90 sal in dewleta tirk li hemberî kurdan xerabiya nekiriye nemaye. Geh zor û şîdet bi kar aniye, geh jî dek û dolabên pir sinsî  û îblîsane gerandiye.
Lê netîce li ortê ye...
Kurd neqediyan û dev ji doza welatekî azad bernedan. Belovacî wê roj bi roj zêde bûn, xurttir bûn û bi biryardarî bêtir nêzî azadiya xwe bûn.
Bi dîtina min HDP jî ji bo pûçkirina tevgera kurd ya netewî, ji bo têkbirina daxwaza Kurdistaneke azad dan avakirin.
Ji bo ku kurdan bi riya HDPê(partiya Tirkiyê) entegreyî Tirkiyê bikin; hogirî  tirkbûnê û tirkiyebûnê bikin HDP xistin dewrê.
Lê çawa ku planên wan yên berê bi ser neket, projeya HDPê jî ewê negre, bi HDPê jî nikanin tevgera kurd ya netewî pûç bikin û daxwaza Kurdistaneke serbixwe ji dilê kurdan derxin.
Wek zayiatên berê, îcar jî emê hin zayiatan bidin. Hinekên ji refên me biqetin, bi tirkan ra bimînin, bihelin û di dawiyê da bibin tirk. Kurdan berê jî bedel û zirarên wiha dane.
Lê micadela kurd û Kurdistanê, daxwaza dewletbûnê tu carî nesekinî ye. Ji nuha pêva jî ewê nesekine, hetta ewê ji îro gelkî berfirehtir û gelkî xurttir bibe.
Berê dîrokê bi pêşda ye, tu kes nikane vê herikînê rawestîne.
Dîroka tirkan ya 90 salî îsapta vê dîtina min e. Hêdî  hêdî be jî kurd gav bi gav nêzî azadiya xwe bûne.
Li Tirkiyê miletê kurd ewê ji bin vê zulmê rizgar bibe, ew çi planan li hev ragirin jî, çi konetiyê û pîncîtiyê bikin jî weleh bêfeyde ye; çimkî kurdan biryara xwe da ye, naxwazin bindest bijîn…
Loma jî zû dereng serketin ya me ya. Ne hewceye em zêde hev û du biêşînin û dilê hev bihêlin. Bihêlin bira vê plana HDPê jî biceribînin. Wek hevkariya bi şêx, axa, beg û serokeşîran ra ev plan jî ewê pûç bibe.




2 kommentarer:

  1. Ez dibejim heke HDP nekeve meclise dibe ku dev ji tirkiyetiya xwe berde u hin pirtir bibe kurd.

    Le ewe HDP texin meclise ji ber ku ev plana wan e.

    SvaraRadera
  2. Nekeve meclîsê ewê vegere kurdayetiyê, têkeve meclîsê ewê ji bo kurdan tiştekî neke, kurdê jê dûrkevin. Yanî ew çawa bikin jî ewê plana wan pûç bibe.

    SvaraRadera

PARVE BIKE