31 oktober 2016

Tirsa ewê wî bikujin Erdogan bizandiye


Di merasima li ser gorra Ataturk da hemû general û leşker saxî kirine
29ê cotmehê, roja ”Cejna Cumhûriyeta” Tirkiyê, wek her tim Erdogan li pêş û hemû erkan û giregirên dewlet û hukûmetê li pey wî, bi helahopeke mezin çûne ser gorra Ataturk, ji bo ku spasî wî bikin, jê ra sujde bibin…
Helbet ne siwîl tenê, bi serokkomar, serokwezîr û wezîr û svîlan ra, hemû qumandarên ordiya tirk jî beşdarî vê merasimê bûne.
Lê gava zabit û general dikin derbasî hundur salona merasimê bibin, çend başçawîşan pêşiya wan birrîne û hemû general, hemû zabit saxî kirine.
Û him jî bi dedaktoran, gava dedaktorê sînyal daye, başçawîşan herdu destên generalan bilind kirin û îcar bi destan ew baş saxî kirine.
Ev ibret û sosireteke giran e.
Serokkomarek, berpirsên hukûmetekê çawa kanin di vê derecê da ji artêşa xwe bitirsin?
Û gava sivîl hewqasî ji leşkeran bitirsin netîceya vê tirsê ewê çi be û here bigihîje ku?
Artêşa, serokkomar û sivîl hewqasî jê bitirse ewê xwe çawa his bike?
Di dîroka Tirkiyê da tiştekî wiha ev cara pêşî ye dibe.
Meriv dibîne ku Erdogan pir ditirse.Hîn jî baweriya wî bi artêşê, bi leşkeran nayê.
Lema jî hukûmet sivîlan, endamên AKPê çekdar dike, sîlehan li zilamên xwe belav dike.
Mêrik ditirse bi hin zabit û generalan ra sîleh hebe û li ser gorra Ataturk, di wê merasimê da wî bikujin.
Ev panîk e.
Sendroma mirinê ew girtiye.
Di rewşeke wiha da dibê here ser psîkologekî.
Yanî motajî tedawiyê ye.
Însanên di vê rewşa panîkê da pir tahlûke ne, kanin her dînîtiyê bikin. Lema jî meriv kani bibêje Erdogan nexweş e, motajî tedawiyê ye.
Lê kesê biwêribe viya jê ra bibêje tuneye. Lema jî ewê tiştê pir xerab bike û bide kirin.
Rojên pir nexweş û pir tarî li pêş kurd û tirkan e.
Meriv ji vê bûyerê jî fêm dike pir qutufî ye û xofa ewê wî bikujin ketiye dilê wî. Ketiye panîkê, ji her kesî şikê dike û ditirse.
Lê bi qasî xuya ye herî bêtir jî ji leşkeran ditirse, lema jî di merasimekê da jî genaralan dide saxîkirin.
Tirsa ewê wî bikujin 24 saetan di dilê wî da ye.
Nizane mirin kînga, li ku û bi çi hawî ewê bi gewriya wî bigre.
Lê ya xerîb generalan çawa ev heqareta mezin qebûl kirine, ew jî pir seyr e…
Lê pêşeroja Erdogan xerab e, ew çi bike jî ewê xerab biqede…

30 oktober 2016

Mezhebê hin kesan pir fireh bûye


Îbrahîm Guçlu daxwaza hevaltiya Facebookê ji min ra şandibû, min qebûl nekir û jê ra got:  ”Ez daxwaza te ya hevaltiyê qebûl nakim.”
Min ev yek di feysa xwe da belav kir.
Li ser vê, gelek nas, dost û heval aciz bûn û ev şêla min rexne kirin. Hinekan ez bi qebetiyê û hinekan jî ez bi apocîtiyê û gelek îthamên din sûcdar kirim.
Bersîvên min dane van rexneyan, bêyî ku navê wan bidim li jêr in. Gava ez navê wan bidim dibê nivîsên wan jî bjiweşînim.
Viya jî ji ber du sebeban nakim.
Yek, ewê pir dirêj bibe.
Dudu, piraniya nivîsan pir şaş in, gelekên wan nayê fêmkirin. Ez naxwazim hewqas nivîsên şaş di bloga xwe da belav bikim. Lema jî bersvên xwe tenê belav dikim. Ji bo ku gelek kesên din jî kanibin bixwînin.

 Bersîva pêşî…,
Yek bi yek bersîva hemû rexneyan dayin zahmet e, ez fikrê xwe yê li ser vê meselê bibêjim.
Berê min ji Îbrahîm Guuçlu pir hez dikir. Lê nuha qet kêfa min ji fikrên wî ra nayê û naxwazim pê ra bibim dost û heval.
Helbet ne TRT6 tenê, gelek kirin û fikrên Îbrahîm Guçlu bi min ne xweş in. TRT6 ya jî TRKkurdî min tenê wek numûne da.
Gava dewletê dixwest li herêma Licê qereqolan ava bike, Îbrahîm Guçlu di progrmekê da avakirina qereqolan parast û got, ”qereqol tunebin leşkerên li ku bimînin?”
Tiştê hîn zêde jî got lê nuha tam nayê bîra min.
Ya din ez ne li dijî her kesê di TRTê da dixebite me. Min çend caran li ser vê meselê nivîsî.
Ez qala merivên ji rêzê, merivên karkir nakim, merivên ne xwediyên îdîayên mezin nakim.
Ez qala yên berê sereokên partiyên kurd bûn dikim, qala endamên polîtburu û komîtyên merkezî dikim.
Ez qala siyasetmedarên bi nav û deng dikim.
Van serok û siyasetmedaran digotin welatê me di bin îşxala dewleta tirk da ye.
Baş e çi hat guhertin û vê dewletê çi da Îbrahîm Guçlu û yên di mistewa wî da ji bo ku ew bi vê dewleta îşxalkar ra li hev werin û herin him jî di telewîzyona dewletê da bixebitin?
Dewletê bi riya TRTê gelek serok û siyasetmedarên kurd pûç kirin û dû ra jî berra wan da.
Eynî tişt anî serê Îbrahîm Guçlu jî.
Û jê ra negotin çima em te ji kar derdixin.
Îbrahîm kir nekir bersîv jî nedanê.
Îbrahîm bi xwe ev yek nivîsî.
Lê kurd van tiştan qet ji xwe ra nakin problem, her tiştî normal dibînin.
Meriv him kane demakê serokê, birêvebirê partiyekê be, serxwebûna Kurdistanê bixwaze û dû ra jî îstîfa bike û here di telewîzyona dewletê da bixebite.
Dibe ku ev çerxkirin, ev teqlebazî siayasî ji bo hin kesan ne normal be, ne bêexlaqî be, lê ji bo min ne normal e. Û ez tu carî xweş nabînim.

Wek min got, ez ne li dijî her kesê di TRTkurdî da dixebite me. Heta kurd nebin xwedî welat ewê ji dewleta tirk ra bixebitin.
Ev tiştekî din e.
Mesela ez nuha herim di TRTê da bixebitim, ma normal e?
Ne şermeke mezin e?
Kî şerm nebîne jî ez bi xwe karekî wiha wek şermeke mezin dibînim.
Lema jî min numûneya birêz Kemal Burkay da.
Ma nuha Mahmûd Osman here di telewîzyon Îraqê da bixebite û Selah Bedredîn û Hemîdê Hecî Dewrêş jî herin di telewîzyona Sûriyê da programan çêkin rast e, normal e, dibê meriv ne li dij be?
Dev ji îdîa û gotinên din berdin, bersîva vê pirsa min bidin.
Ez dibêjim dibê meriv tiştekî wiha pir eyb bibîne û rexne bike.
Yanî bi dîtina min kesê berê serok bû, polît buro, komîteya merkezî bû, siyasetmedarekî naskirî bû û Kurdistaneke serxwe dixwest dibê neçe di telewîzyona dewletê da bi pera programê çê neke.
Rexneya min li kesê wiha ye, ne li herkurdî ye.
Me û dewleta tirk carê deng ji hev aniye, em û dewlet di şerekî da ne. Sê perçeyên welatê me di bin îşxala vê dewletê da ye.
Dibê ev yek li hemberî dewleta tirk bi me ra sekneke netewî û kînekê peyda bike
Ne dewleta tirk dewleta 40 sal berê ye û ne jî em siyasetmedarên 40 sal berê ne.
Bi baweriya min gelek sebebên îdeolojîk, siyasî û exlaqî yên cidî hene ji bo ku kesên xwedî îdîa di dezgeheke wek TRTê da nexebite.
TRT ne zanîngeh e, TRT her şev li ser kurdan çi dibêje, çi belav dike, kê dide peyivandin li ortê ye.
Ji bo min TRTkurdî ne do û ne jî îro, tu carî nebû dezgeheke ez kanibim lê bixebitim, min karekî wiha tu carî layiqî xwe nedît. Lê ji bo hin kesan kane ne problem be. Her kes mesûlê xwe ye.

XXX
Bersîva …..:
Di nivîsa xwe da min pirseke kiriye. Xêra xwe bersîva pirsa min bide, li ser vê pirsa min fikrê xwe bibêje…

Min gotiye, birêz Kemal Burkay here di TRTê da, Mahmûd Osman di telewîzyona Îraqê da û Selah Bedredîn û Hemîdê Hecî Dewrêş jî di telewîzyona Sûriyê da programan çêkin rast e, normal e, dibê meriv ne li dij be ya na?
Dibê meriv hevaltiya wan qebûl bike ya na.
Ez dibêjim dibê meriv tiştekî wiha pir eyb bibîne û rexne bike.

XXX
Bersîva….
Li dora mijarê negerin, li ser vê pirsa min fikrên xwe bibêjin.

Di nivîsa xwe da min pirseke kiriye. Xêra xwe bersîva pirsa min bidin, li ser vê pirsa min fikrê xwe bibêjin…

Di minaqeşên wiha da sekna însên ya li hemberî dewletê û kesên oportunîst û teqlebaz diyar dibe.

Min gotiye, birêz Kemal Burkay here di TRTê da, Mahmûd Osman di telewîzyona Îraqê da û Selah Bedredîn û Hemîdê Hecî Dewrêş jî di telewîzyona Sûriyê da programan çêkin rast e ya na, dibê meriv li dij be ya na?

Dibê meriv hevaltiya wan qebûl bike ya na.
Ez dibêjim dibê meriv tiştekî wiha pir eyb bibîne û rexne bike

.Ji bo hinekan meriv kane here di TRTê da programan çêke, ew nebû here here Dunya TVê,rojekê aqil bide dewletê, roja din pesnê cimatê bide, beşdarî kokteylên medyaya Gulen bibe, lê dîsa jî kurdperwer be, dîsa jî dibê meriv bide ser serê xwe.

Bi Xwedê mezhebê min hewqasî ne fireh e…

XXX
Bersîva…,
Xwezî her siyasetmedar bi qasî min dirist bûya.
Ji bo ku ez ne durû me, ne merivê tu partiyê me, tiştê rast nebînim rexne dikim, lema jî ”dijminên min ji dostên” min zêdetir in, lema jî hevalên tu partiyê ji min hez nakin
Ne yek û dudu, di bloga min da belkî bi sedan nivîsên min yên rexnegirî li ser Ocalan û PKKê hene. Him jî rexneyên pir giran in.
Ez bawer dikim gelek caran te bi xwe jî ecibendiye.
Yanî qulpa hevalbendiya bi PKKê ra hewleke vala ye.
Heger min siyaseta PKKê rast bidîda minê eşkere bigota, min hevaltiya xwe venedişart. Tu sebeb tuneye ku înkar bikim.
Lê ya muhîm ne ku ez çi me û hevalê kê me, min şêlek rexne kiriye. Hûn wê şêlê yanî xebata Guçlu û yên wek wî di TRTê da ras dibînin ya na?
Mijar ev e, tiştên tin qal û qîlên vala ne…


XXX
Bersîva….

Min di nivîsaxwe da jî û di bersîva xwe da jî gotiye, min berê ji Îbrahîm Guçlu pir hez dikir.
Heta çendsal berê jî em dostên hev bûn û min qedir û qîmeteke pir mezin didayê.
Erê di hin waran da em cihê difikirîn. Ev ji bo min qet ne muhîm bû. Îbrahîm Guçlu ne îro, ji zûda ye li hemberî PKKê û Ocalan e. Ev dîtina wîya li ser PKKê ji bo min tu carî nebû problem, tu carî nebû sebebê xerabûna dostaniya me.
Di mesela esasî da, yanî dijminê me yê esasî dewleta tirk e û şer û xebata me jî dibê li hemberî vê hêza îşxalkar be, em mitefik bûn.
Lê Îbrahîm Guçlu nuha ji wê nuxtê dûr ketiye, tabî li gorî fikrê min, nuha dijminê wî yê esasî PKK ye, HDP ye, ne dewleta tirk e.
Ne ku ez dibêjim bira ne li dijî wan be, bira li dijî wan be, lê bira li hemberî dewleta tirk jî, li hemberî cimata Gulen jî wisa bêkompromîs be.
Bi qasî min dîtiye û ez dibînim li hemberî wan wek hevîr e, bi herduyan ra jî demakê nabêna wî baş bû.
Lema jî kane di telewîzyona dewleta tirk da, li gel tu mecbûriyeteke wî ya aborî û siyasî tunebû, kar bikira, di vê yekê da tu şaşîtiyeke siyasî, îdeolojîk û exlaqî nedît.
Bi medyaya cimata Gulen ra jî nabêna wî baş bû.
Lema jî Îbrahîm Guçlu ji bo min êdî ne Îbrahîmê Guçluyê dema Rizgarî û Ala Rizgarî ye, ne mimkûn e ez wek berê jê hez bikim û hurmetê nîşanî wî bidim.
Çimkî ew mezin bû, lê bi çûna TRTê xwe biçûk xist.
Min ne Îbrahîm Guçluyê DDKO, Rizgarî û Ala Rizgarî, Îbrahîmê nuha, Îbrahîmê di telewîzyona dewletê da kar kiriye qebûl nekiriye û rexne kiriye.

"Ohh! Tirkiye welatekî ne baş e, venegere, li vir bimîne."

Kalekî reşikê emerîkî: "Ohh! Tirkiye welatekî nebaş e, venegere, li vir bimîne."
Turkan Tosun keçeke kurd e. Di twîtteke xwe da qala serpêhatiyeke xwe kiriye.
Kalekî reşikê 65 salî li Washingtonê welatê wê jê pirsî ye. Wê jî gotiye, ”Tirkiye”.
Kalê reşik gotiye:
"Ohh! Tirkiye welatekî nebaş e, venegere, li vir bimîne."
Min jî ev şiroveya jêr nivîsî:
”Ji bo ku meriv nizanibe Tirkiye welatekî ne baş e dibê meriv kerr û kor be ya jî bêûjdan û bêbext be. Û wek kurd jî dibê cahş be."
Lê çi heyf hîn jî bi hezaran kurdên dibêjin Tirkiye welatekî baş e, heq, huqûq, edalet lê heye.
Tirkiye zulmê li kurdan nake, heqê kurdan naxwe.
Kalê reşikê 65 salî ji Emerîkayê dibîne Tirkiye welatekî ne baş e, ne welatekî ku meriv lê bijî, lê Mehdî Eker, Mehmet Şîmşek, Muhsîn Kizilkaya, Mehmet Metîner, Cevdet Yilmaz, Galip Ensarîoglu, Cûma Îçten û bi hezaran kurdên din nebaşiya Tirkiyê qebûl nakin û wek komandoyên siyasî yên dewleta tirk zulm û terora dewleta tirk li kurdan dike diparêzin û dibêjin Tirkiye welatekî pir baş e, yên dibêjin Tirkiye ne baş e viran dikin.

 XXX
Wek xwediyê Tirkiyê û bavê miletê tirk, Erdogan êdî ewê rektorên zanîngehan jî tayin bike
Ji nuha û pê da rektorên zanîngehan(unîversîteyan)ewê ji alî Erdogan ve werin tayinkirin.
Berê, rektorên zanîngehan bi hilbijartinê dihatin hilbijartin. Lê xwediyê Tirkiyê û bavê miletê tirk yê nuh Recep Tayyip Erdogan, ev sîstem rakir.
Ê ji xwe ya rast jî êdî ev e.
Çimkî Tirkiye êdî ya şexsê Erdogan tenê ye, lema jî pir normal e ew rektorên zanîngehan jî, hakim û dozgeran, polîs û bekçiyan û hemû mamûrên dewletê tayin bike.
Ji ber ku dewleta ya wî ye, bûye ya wî, karkirên xwe jî helbet dibê ew bigre kar.
Ez di vir da tu anormaliyekê nabînim.
Wek xwediyê Tirkiyê ev mafê wî ye, dilê wî kê bixwaze dibê wî bike rektor, polîs, bekçî, hakim û dozger.
Xwedê li gorî çiyê berfê lê dibarîne, miletê tirk tam layiqî zilamekî wiha ye, faşîstekî qerase…
Tirk ji tirsê, ji ço, ji lêdanê fêm dikin. Kî pê li serê wan ke ji wî hez dikin.
Ço ji cinetê derketiye…
Erdogan jî ev yek fêm kiriye, mêrik miletê xwe baş nas kiriye, lema jî tam li gorî dilê tirkan tevdigere.
Emê çawa ji vê qîrê, ji vê belayê, ji vê girêka bi gû xelas bibin ez nizanim…


29 oktober 2016

Payina edaletê ji dewleta tirk safiyeke mezin e

Hin kurd ji dewleta tirk edaletê dixwazin, edaletê dipên, dixwazin dewlet adil be, bi edalet be, bêqanûnî û bêedaletiyê neke…
Ev, daxwaz û hêviyeke şaş e.
Çimkî dewleta tirk li hemberî kurdan tu carî adil nabe.
Hedefa dewleta tirk tim û tim helandina kurdan bûye.
Ji bo gihîştina vê hedefa xwe, carnan zulma xwe zêde û carnan jî kêm kiriye.
Carnan bûye polîsê baş û carnan jî bûye polîsê xerab.
Lê tu carî gunehê dewleta tirk, gunehê partî û hukûmetên tirk, gunehê miletê tirk bi kurdan nehatiye û îro jî pê nayê.
Wek kurd edaletê ji dewleta tirk, ji hukûmeta AKPê nepên.
Tenê êdî silavê nedin cahş û xayinên xwe û ji wan ra bibêjin hûn jî şirîkê vê zulmê ne û hûn cahş in, hûn neyarê qewmê xwe ne.

XXX
Azadiya Welat, DİHA û gelek rojname û ajansên din girtine.
Gelek akadîmîsyen ji zanîngehan bi dûr xistine.
Ewê hemû partiyên kurd jî bigrin.
Ewê serok û berpirsiayrên partiyan jî bigrin û zindan bikin.
Li Tirkiyê koalîsyoneke faşîst ya MHPê û AKPê heye.
Di rojên pêş da ewê gelek tiştên xerab bikin.
Li başûr û rojava serketinên kurdan Erdogan har kiriye, dixwaze di vê qerembola Sûriyê, Îraqê û bi tehdîda koçberan kurdan baş biêşîne.

XXX
Dr. Saîd Çurukkaya jî tevî karwanê şehîdên Kurdistanê bû !
Xebera reş, xebera ku min tu carî nedixwest bibihîzim, xebera şehîdbûna Dr. Saîd Çurukkaya, min jî nuha bihîst.
Min tu carî nedixwest vê xebera reş û tahl, şehîdbûna Dr. Saîd Çurukkay bibihîzim.
Lê sed heyf û mixabin Saîd, pir zû ji nava me û pêşmergeyên qehreman çû tevî rêfên şehîdên Kurdistanê bû...
Neyarên hov, Daîşiyên namerd, qatil, çeqel û çuqûlên ereb û Tirkiyê, Saîd Çurukkaya bi qeleşî, di temenekî ciwan da ji nava me birin.
Qumandar û lehengê hêzên pêşmerege, egîd û xweşmêrê kurd Dr. Saîd, bi xebat û fedekariya xwe ya ji bo rizgarbûna Kurdistanê di dilê hemû kurdan cî girtiye, bûye lehengekî nemir.
Miletê kurd, her kurdê bi xîret û bi namûs ewê tu carî vî egîdê û xweşmêrê welatê xwe Dr. Saîd Çurukkaya ji bîr neke, tim bi hurmeteke mezin bibîr bîne.
Ji bo ku ez xemgîniya xwe binîmim zimên ez
Cangoriyê Kurdistanê Saîd Çurukkaya nemir e.
Bira serê malbata wî, hêzên pêşmerge û gelê kurd sax be !!!


Şelafekî profesyonel

Şelafekî, ruhkoleyekî, xwefiroşekî bi navê Mehmet Metîner heye. Rast derew dibêjin kurd e.
Mexlûqekî ji hemû cewher, hêjayî û xusûsiyetên însanî şuştî ye, şelafekî pir bêheya ye.
Wek şelafekî bi nav û deng(dalkavûk, şalûz), ji bo ku ciyê xwe nede kesî li ser Erdogan şelafnameyeke mişt methiye nivîsî ye, pir pesnê xwediyê xwe daye û di dawiyê da gotiye:
“Mesaja te da me girt.
Tu bibêjî çi wek te.
Bicîanîna her gotina te deynê hustuyê me ye.
Heger bîat be bîat, îtîat be îtîat.
Bi mirinê em li pey te ne Reîs !”
Bi îktîdara Erdogaan ra jimara şelafan(dalkavukan)bi şiklekî astronomîk bilind bû, kurva wan firiya hewa.
Bi sedan şelafên(dalkavuk) kurd li ber deriyê Erdogan, li dora wî bûne perwane, pey li serê hev dikin.
Ji bo ku ji Erdogan eferimkê bigrin.
Ji boku bala Erdogan bikşînin ser xwe.
Ji bo ku ji Erdogan eferimekê û bexşîşekê bigrin şalûziyên, qeşmeriyên nemayî dikin…
Xwe ji Erdogan ra dikin erd, dikin paspasa sola wî, dikin dismala lîçika wî.
Ev şelafê bi navê Mehmet Metîner, yek ji şelafên bi nav û deng e, herî bitecrûbe ye.
Wek qereçiyê di dawetan da li defê dixe, kî şabaşê zêde bidê, wî bi asîmanan dixe, wî dike lokê hêcê girgîn û ji wî ra xweş dike, halanên herî mezin û bi heybet di wî hildide.
Bi kurtî Metîner şelafekî pir jîhatî ye, wek şelafekî profesyonel û karê xwe pir baş dike…


Beyana Selîm Çurukkaya û çend gotin li ser vê malbata canfîda


Birayê Dr. Seîd Çurukkaya, Selîm Çurukkaya, li ser rewşa birayê xwe û cidîyeta birîna wî agahdariyeke kin belav kiriye.
Agahdariya kekê Selîm Çurukkaya tesîmereke mezin li min kir, kela dilê min rakir.
Di vê beyana wî da ez fêr bûm du birayên wî di ji bo azadî û serxwebûna Kurdistana bakur şehîd ketine û nuha jî Seîd giran birîndar e.
Her kesê tevî xebat û micadela kurd û Kurdistanê bûye pir hindik bedelek daye.
Lê mabata Çurukkaya, wek malbat bedelekî pir û pir mezin daye. Fêrbûna vê êşa wan a giran dilêmin gelkî êşand û hurmet û evîna min a li hemberî malbata Çurukkaya hîn jî mezin bû..
Malbatên bedelên wiha giran dana helbet di nava kurdan da hene, hin dê û bavên 4-5 zarokên xwe wenda kirine, hin malbatên ji kok da wenda bûne jî hene.
Malbata Çurukkaya jî yek ji van malbatên di riya kurd û Kurdistanê da bedelekî pir mezin daye. Malbatên wiha welatparêz, hewqasî fedakar û canfîda pir kêm in.
Beyana kekê Selîm Çurukkaya bi tirkî bû. Dilê min razînebû, min wek kêmasiyekê dîd beyana li ser egîdekî wek Seîd Çurukkaya tenê bi tirkî be.
Lema jî bêyî ku ji Selîm Çurukkaya bipirsim min beyana wî wergerand kurmancî.
Ji bo ku kurdên bi tirkî nizanin ew jî wek min fêr bibin vê malbata kurdperwer ji bo rizgarbûna Kurdistanê bedelekî çiqasî mezin daye…
”Hevalên hêja,
Îşev saet ji 23a û vir da, birayê min Dr. Seîd Çurukkaya hîn di xew da ye. Nirxên xwîna wî berbî normalê ve diçe. Ji Almanya yê Helîkoptereke Ambulans ji bo ku Seîd Çurukkaya bibe Almanyayê li balafirxana Hewlêrê daket.
Kesên di vî warî da xwe diwestînin û xebateke dîplomatîk dimeşînin, kesên ku li ber deriyê nexweşxanê bêyî ku rakevin Seîd dipên, ji hukûmeta Almanya ra, ji kesên li nexweşxanê ji wan ra cî temîn kirin, ji hukûmeta Kurdistana Federe ra spas dikim.
Min du birayên xwe ji bo rizgarbûna Kurdistana bakur şehîd dan, Seîd ji bo rizgarbûna başûr canê xwe feda kir.
Ezê jî ji bo her çar perçeyên Kurdistanê nefesa xwe ya dawî bidim. Hebûna kesên me fêmnakin qet ne xema min e.”
///Mehmet Selîm Çurukkaya

XXX
Ev 3 roj in internet ji ser 8 bajarên Kurdistanê qut kirine
Ev 3 roj in li 8 bajarên Kurdistanê înternet tuneye, bi bo ku kes dîmenên zulm, zorabatî û terora dewletê nebîne, medya cîhanê ji bûyerên diqewimin haydar nebe, hukûmetê têkiliya kurdan û dinyayê qut kiriye.
Bûyerên wiha nîşan didin gava mesele dibe kurd û Kurdistan demokrasî, azadiya çapemeniyê, azadiyên şexsî û yên komînîkasyonê hemû ji bo hukûmetê û dewleta tirk formalîte ne.
Çimkî dewleta tirk, çimkî hukûma AKPê kurdan naxe dewsa însên, lema jî muamela însanan bi kurdan ra nakin.
Gava hewce dibînin li bajarana bi mehan derketina derve li însanan yasax dikin.
Gava dilê wan dixwaze, bi hefteyan, bi mehan nişteciyên bajarekî bê ceyran, bê av dihêlin.
Lema jî 3 rojan qutkirina internetê ne tiştek e, kanin 3 mehan jî qutkirî bihêlin.
Lê gelek kurdên kêmaqil û bêxîret hîn jî fam nekirine ku tirk kurdan naxin dewsa însên, hîn jî bi çavê koleyan li kurdan dinêrin…
Lema jî 3 rojan internetê li ser 8 bajarên kurdan qut dikin…

2016-10-28

28 oktober 2016

Çîroka hechecikê: Di jiyanê da hin fersend hene tenê carekê dikevin destê meriv

Dibêjin carê dilê hechecikekê ketiye yekî. Her roj çûye li ber paça wî veniştiye û bi saetan li mirêk temaşe kiriye.
Rojekê êdî deyax nekiriye û ji mêrik ra  gotiye, ”tu zanî, dilê min ketiye te, ez ji te hez dikim. Pacê veke û min bigre hundur.”
Mêrik matmayî maye, gotiye , ”ev çi gotina beradayî ye? Tu çivîkek e û ez jî însan im. Çivîkek çawa kane bibbe dildarê însanekî? Tiştekî wiha nabe. Here îşê xwe” û hechecik bera hundur nadeye, ji ber paca xwe qewitandiye.
Lê hechecik neçûye, dîsa gotiye:
Hechecikê gotiye:
”Ez ketime bextê te pacê li min veke, min bigre hundur, emê bi hev ra bijîn. Emê bi hev ra bibin dost û heval, emê jiyaneke xweş û rojên bextewar bi hev ra derbas bikin. Derve pir sar e, ez ji sar û sermê dikim biqefilim. Pacê li min veke.” Mêrik dîsa gotiye, ”nabe” û pace lê venekiriye û gotiye ji ber paca min here.
Hechecik çûye lê bîsteke din dîsa paş da hatiye û cara sisiyan ji mêrik ra gotiye:
Ji te rica dikim min bigre hundur. Derve pir sar e, ez dikim biqefilim. Tu zanî ez ne çivîkeke sermayê me, ez kanim tenê di hewayên germ da bijîm. Hegertu min berra hundur nedî, ji mecbûrî ezê koçî welatên germ bikim. Rica min ji te min bigre hundur ji bo ku ez li vir bijîm û neçim welatekên germ. Emê bi hev ra bikin û bixwin, ezê li ser girmika te venim û kêfa te bînin, emê bi hev ra demên xweş derbas bikin. Ji xwe wa ye tu jî wek min bi tenê yî, ewê him sebra me bi hev were û him jî emê bi hev ra kêf kêf bikin.
Lê mêrik dev ji înada xwe bernedaye, gotiye na, ez dixwazim bi tenê bijîm. Ji ber paca min here û min zêde nerehet neke.
Li ser vê bersîva mêrik, hechecik bi dilekî şikestî û bi xemgîniyeke mezin firiya ye û çûye. Lê dû ra mêrik poşman bûye, ji xwe ra gotiye:
”Yaho ez merivekî çiqasî totikvala û kêmaqil im, min çima hechecika xweşik ber ahundur neda, çima min daxwaza wê ya jiyameke bi hev r aqebûl nekir? Emê bi hev ra bimana, ewê sebra me bi hev bihata.
Yanî gelkî poşman bûye. Lê poşmaniya wî jî êdî perenekiriye, hechecik carê çûye û berê xwe daye welatên germ.
Dû ra ji xwe ra gotiye, de tişt nabe, salê tê, gava germê dest pê kir, ewê dîsa were. Wê çaxê ezê wê bigrim hundur û emê bi hev ra bijîn. Û paca xwe vekirîye, tim vekirî hîştiye. Bi hêviya rojekê ewê hechecik dîsa paş da vegere.
Bi hatina havînê ra hechecik jî paş da hatine gund. Lê hechecika wî nehatiye. Heta dawaiya havînê paca xwe negirtiye, wer li ber rûniştiye. Lê hechecik nehatiye.
Ji hechecikên hatine pirsî ye, lê kesî hechecika wî nedîtiye. Çuqasî lê geriya ye, ji her hechecikê pirsî ye jî şopa wê bi dest nexistiye.
Ji bo ku derdê xwe, serpêhatiya xwe bibêje lêxistiye çûye ba kalekî zane, hamîhama, xwediyê aqil û fama. Ji kalo ra serpêhatiya xwe ji serî heta dawî, yek bi yek gotiye.
Kalê zane jê ra gotiye, ”temenê/umrê hechecikan li ser hev 6 meh in. Di jiyanê da hin fersend hene tenê carê dikevin destê meriv, heger meriv ji dest xwe birevîne wek hechecikê difire û dihere û careke din jî hew paş da tê…

Dersa em ji vê çîrokê bigrin; di jiyanê da hin fersend hene tenê carê dikevin destê meriv, tên carê tên ber deriyê meriv. Meriv qîmeta wê nizanibe, nizanibe bi kar bîne ji destê meriv difire û dihere û careke din jî paş da nayê.

Li Kurdistana başûr û rojava fersendeke tarîxî ketiye destê kurdan. Heger siyasetmedarên kurd, partiyên kurd yên xwedî hêz jêr bin, ewê vê fersendê ji dest xwe nerevînin û Kurdistanê ava bikin.
Ev cara duduyan e hechecik tê ber paca kurdan, lê kurd wê diqewitînin, hêvî dikim vê carê jî neqewitînin.


Not:Di çîrokê da umrê hechecikê(dûvmeqesk)6 meh hatiye gotin, lê ev ne rast e, ev çîrok e, umrê hechecikê gelkî dirêjtir e, belkî heta 10-15 salan jî kane dirêj be.

Ê bi kêmanî emê di vê riya bi şeref da bimrin

Ji mûriyê(gêreyê) pirsîne, gotine:
- Ma tu wiha bi ku da diçî?
Mûriyê gotiye:
-Ez diçim hecê
Gotine:
-Bi vê çûnê tu nikanî bigihîjî hecê.
Mûriyê gotiye:
-Ê bi kêmanî ezê di riya wê da bimrim.
Hin kurdên bêxîret, hin kurdên hevalên neyar, hin kurdên bê vîzyon û bê hêvî dibêjin Kurdistaneke azad tenê xeyal e, xebat û micadela ji bo wê kedeke belasebeb e.
Dewleta tirk xurt e, em nikanin bi wan.
Emê kanibin Kurdistaneke azad bibînin ya na ew minaqaşeyeke din e, ew girêdayî gelek faktorên der û hundur e.
Lê heger em bi xwe Kurdistana serbixwe nebînin, wek mûriyê jî gotiye, emê di riya wê da bimrin.
Ev rêwîtî û mirineke pir bi şeref e.
Qenekê kes nikane ji zarok û neviyên me ra bibêje bav û kalên we xayinên qewmê me xwe û hevalên neyar bûn…

XXX
Tu Wan î, tu can î...
Di malpera feysa xwe da ez nuha rastî vê şiîra xwe hatim.
Di 28ê cotmeha 2011 da min li ser erdheja Wanê nivîsî ye.
Min ji bîr kiribû, qet nedihat bîra min. Feysê îro nivîseke min ya din ya 5 sal berê bi bîra min xist, ev şiîr jî min eynî rojê nivîsîye.
Tiştê herî xweş û sebebê ez wê careke din diweşînim, gorbuhuşt Arjen Arî jî ecibandiye û gotiye:
” Ezbenî ji vé helbesté diyar e tu jî hozanvan î!
Arjen Arî”
Ez vî şairê mezin, evîndarê kurd û Kurdistanê bi hurmet bibîr tînim.
Tu Wan î,
tu can î,
lawên te nahêlin tu bibî wêran î.
tu wan î,
tu warê bav û kalên kurdan î
kurd ewê birînên te derman bikin,
te dîsa bikin bûka Kurdistan î.
ji bo te ev soz û peyman e,
ji neviyên Selahedînê Eyûbî
2011-10-28
///Zinarê Xamo

XXX
Kurdan tu carî ji bo hinekên din, bi emrê hinekan şer nekirine, tim ji bo azadî û serxwebûna xwe li hemberî dewletên dagîrker serî hildane û xwîna xwe herikandine...
Îro jî ji ber eynî sebeban kurd li her çar perçeyên Kurdistanê ji bo azadî û serxwebûna xwe bi egîdî şer dikin.

Derew û bêbextiyên tirkan nikane vê rastiyê belovacî bike. Yê bi Daîşê li hemberî kurdan şerekî namerdane dimişîne Tirkiye ye.

27 oktober 2016

Erdogan dibêje ewê nenûkên kurdan bikşîne !


Erdogan nuha jî kurdan bi nenûkkişandinê tehdît dike. Mêrik di axaftina xwe ya do da wek sadîstekî gotiye ”kî li hemberî me destê xwe bilind bike, emê texsîr nekin nenûkên wan bikşînin.”
Bi ”kî” helbet qesta Erdogan kurd in, dibêje heger kurd teslîm nebin û mucadela xwe ya ji bo azadiyê bidomînin, emê nenûkên wan bikşînin.
Weleh ji xwe heta nuha tiştê nekirine ev e; serî jê kirine, guh jêkirine, çav derxistine, bi sedan însan saxsax di zêrzemiyan(bodruman)da şewitandine.
Tiştê kêm, kişandina nenûkan bû, wa ye xwediyê Tirkiyê û bavê panturkîzmê yê nuh Recep Tayyip Erdoganê nenûkkêş, ji muxtaran ra gotiye kî li hemberî wî rabe ”ewê texsîr nekin nenûkên wan bikşînin.”
Bi baweriya min mimkûn e, ji faşîst û nazîstan, ji merivên sadîst her tişt tê, ji bo ku ji kursiya xwe nebe ewê nenûkên kurdan jî bide kişandin…

XXX
Îro ji sedî 99ê tirkan li hemberî kurdan bûne Devlet Bahçeliyê faşîst..
Dîtina serokê MHPê Develet Bahçeliyê faşîst ya ji bo çareseriya mesela kurd her kes zane zor e, şîdet e, girtin û kuştin e.
Li gorî dîtina Bhçelî, dibê li Kurdistanê kevir li ser kevir û serî bi laşan ve nemîne.
AKP nuha li Kurdistanê tam vê siyaseta MHPê dimeşîne; zor, teror, girtin û kuştin.
Girtina siyasetmedaran, serokên belediyan û îşxala belediyên di destê kurdan da.
Yanî erê MHP ne li ser hukim e, lê fikrê wê li ser hukim e, tiştê Bahçelî di îktîdara xwe da ewê bikira, Erdogan deh qatî wê dike.
Û lema jî Bahçelî wek paşmêrekî li pişt Erdogan e.
Bi baweriya min kî çi bibêje jî Erdogan(ez nabêjim hukûmet, ji ber ku hukûmet mukûmet tuneye, Tirkiye Erdgoan e)ewê guh nedê, ewê vê terora li hemberî kurdan bidomîne.
Di rojên pêş da ewê gelek parlamenter, Demirtaş jî di nav da, bi zor bibin mahkimê û hinekan tewqîf jî bikin.
Yanî Erdogan vê teror û êrîşa irqçî û faşîzan ya li hemberî kurdan him li Tirkiyê û him jî li Kurdistana başûr û rojava ewê bi hemû hêza xwe bidomîne.
Ez bawer nakim ji derve, ji alî Emerîka û Ewrûpayê ve reaksiyoneke cidî were.
Erê ewê bi devkî rexne bikin, bibêjin vana kirinên antîdemokratîk in, ”em bûyeran taqîp dikin”, filan û bîvan, lê ewê di gotinê da bimîne.
Ji ber ku Erdogan bi qarta mahciran Ewrûpa û bi Daîşê jî Emerîka êsîr girtiye, dibêje heger hûn zêde min nerehet bikin ezê bi milyonan koçber rêkim ser Ewrûpa û ezê çeteyên xwe yê Daîşê hartir bikim, bêtir bera canê we bidim.
Lema jî Emerîka û Ewrûpa naçin ser Tirkiyê, rewşê îdare dikin. Erdogan viya baş zane, lema jî mêrik her roj wek dîkan dixwîne, dibêje ”kî li hemberî min destê xwe rake ke ezê nenûkên wan bikşînim.”
Tiştê kurd bikin yekîtî û liberxwedan e, dibê Erdogan û civata tirk ya faşîst careke bibîne şîdet, teror, girtin û kuştina kurdan ne çareserî ye. Ev jî ewê wextê bigre…


26 oktober 2016

Plaanên Tirkiyê li ser Kurdistana başûr pir xeter in


Bi ricayê, bi qurban û heyranê, bi libergerê û zeytkirinê hukûmeta AKPê û Erdogan siyaseta irqçî û antî-kurd bernadin.
Hêviyeke wiha vala ye.
Tiştê kanibe hukûmeta AKPê di vê siyaseta antî-kurd da frên bike yekîtiya kurdan û tifaqa wan ya bi Emerîka û Xerbê ra ye.
Li başûr, li rojavayê Kurdistanê rewş hatiya ber guhertina xerîtiyên Sûriyê û Îraqê.
Li van herdu welatan kurdan beşekî mezin yê welatê xwe rizgar kirine û di rojên pêş da kanin bibin yek û serxwebûna xwe îlan bikin.
Tirk vê yekê dibînin û lema jî ketine panîkê, lema jî wek boxeyekî har êrîşî der û dora xwe dikin, Daîşê dişînin ser Kerkûkê, bi balafiran başûr û rojava bombebaran dikin.
Tirkiye ewê van êrîşên xwe bidomîne. Bi taybetî li başûr, li Hewlêrê û li hin bajarên din ewê gelek teqînin din bikin. Van êrîşan kanin pir mezin bin.
Dibê hukûmeta Kurdistanê tirkên li başûr, hêzên tirk yên li wir baş di bin çavdêriyê da bigrin.
Nuha hedefa Tirkiyê ya herî mezin tevlihevkirina başûr e, dibê berpirsiyarên başûr tedbîrên xwe bigrin.
Plana Tirkiyê ya B û C êrîşên ser Kurdistana başûr û ser hêzên YPGê ye.
Lê bi taybetî li başûr ewê gelek sabotaj û teqînan bidin kirin. Ev îhîmal hema hema sedîsed e, çimkî di destê wan da ew maye. Ordiya wan Daîşê têk diçe. Lema jî ewê giraniyê bidin teqînan, sabotajan.
Dibê kurd ji Emerîkayê alîkariyê bixwazin.


XXX
Wezîrê karên derve yê Tirkiyê Mevlût Çavûşoglu gotiye, ”Emê YPGê bi zor ji Munbicê derxin.”
Ji xwe çi ji destê we tê hûn dikin, hûn her roj êrîşî kurdan dikin, gund û kozikên kurdan topbaran dikin.
Gava Munbic di destê Daîşê da bû Çavûşoglu qet jê aciz nedibû, rojekê negot ewê Daîşê bi zor ji Munbicê derxin.
Lê ev çend meh in Munbic ketiye destê kurdan, har bûne, her roj kurdan tehdît dikin.
Ji Daîşê ne cîrantiya Daîşê ne aciz in çimkî Daîş hêzeke wan ya îllegal e, Daîş ordiya îslamî ya Tirkiyê ye. Tirkiye Daîşê îdare dike. Serokê Daîşê yê herî mezin Erdogan e. Ev rastî di praktîkê da li ber çava ye, lê zû dereng rojekê bi belge ewê were îspatkirin jî.

XXX
Xebereke xemgîn !

Li gorî Koroxlî Karaaslan di face xwe da dinivîse fermandarê pêşmerge Dr. Saît Çûrukkaya, bîstek berê li herêma Başîkayê di dema îmhakirina bombeyekê da giran birîndar bûye.
Bi helîkopterê rakirine Hewlêrê.
Birîndarbûna Saîd, ev xebera reş û bêyom wek tîrekê li dilê min ket.
Ez gelkî xemgîn bûm. Hêvî dikim birîna wî ne giran be û tiştek pê neyê.
Kurdperwer û canfîdayên wek Saîd Çurukkaya kêm in.
Dr. Saît Çurukkaya kurdekî fedekar, canfîda, bi namûs û evîndarî welatê xwe ye.
Rehetiya li Ewrûpayê, pere, pûl û malê dinyayê di ser rizgariyê welatê xwe ra negirt û wek şêra çû bi pêşmerge ra li hember hovên Daîşê ket kozika şer.
Çurukkaya, bi pisporiya xwe ya li ser teqemeniyê heta nuha ji gelê xwe ra xizmeteke pir mezin kir, belkî bi sedan kurd ji seqetbûnê û mirinê xelas kir.

Hêvî dikim tiştek bi welatparêzê canfîda neyê. Jê ra sihetê û jiyaneke dirêj dixwazim.

Miletê bindest ne xwediyê tu tiştî ye

Di êrîşa Daîşê ya li Kerkû kalekî 70 salî, Mam Heme Şîn, peşmergeyekî kevn bûye, rahîştiye keleşa xwe û çûya hawara hêzên ewlekariyê.
Piştî şer, Mam Heme Şîn beyanek daye, gotiye:
”Ez 70 salî me. Şikir ji Xwedê ra mal û milk û perê min heye. 12 zarokên min û gelek neviyên min hene. Lê belê welat ji jinên me, ji zarok û mal û milkê me bi qîmettir e. Heger tu li welatê xwe ne azad bî van tiştan yek jî ne yê te ye.”
Bi milyonan kurdî wek vî kalê hêja ev rastî hîn fêm nekirine, hîn mal û milk û pera di ser welatekî azad ra dibînin. Hîn fêm nekirine ji ber ku bindest in ew ne xwediyê tiştekî ne. Ew tenê bekçî ne.

XXX
Polîsên tirk îro hevserokên belediya Diyarbekrê Gulten Kişanak û Firat Anli girtin bin çavan û dû ra jî girtin ser belediyê
Bi sedan pûlîs nuha belediya Diyarbekrê îşxal kirine û li hundur belediyê saxî dikin.
Nahêlin abûqat û kes here hundur.
Bi hezaran însan li ber belediyê kom bûne û vê zorbatî û îşxala dewleta tirk protesto dikin.
Girtina herdu serokan û îşxala belediyê bi şîdet protesto dikim.

XXX
Heger em naxwazin tirk hertim werin li hustiyê me siwar bin, wek nuha li Amedê dikin, dibê em ji bindestiyê xelas bin, bibin xwedî dewlet, dewletê, serxwebûnê xeyal bikin.
Kesên dewletê naxwazin, wê bêmane dibînin, dibê ji terora li Amedê jî aciz nebin.
Bindestî wiha ye, meriv ne xwediyê tu tiştî ye...



25 oktober 2016

Tahlûke pir mezin e !


Tirkiye Kurdistana başûr bi îşxaleke berfireh tehdît dike.
Kurdistana başûr jî  wek rojava, wek binxetê rûbirûyî tahlûkeyeke pir mezin e.
Wezîrê Tirkyê yê karên derve Çavûşoglu gotiye gava ewlekariya wan têkeve xeterê(ev demagojiyeke vala ye, kes Tirkiyê tehdîd nake, wan çavê xwe berda ye erdê xelkê), wek li Sûriyê kirin, li Îraqê jî ewê herêmeke ewle çêkin.
Yanî ewê Kurdistana başûr jî wek rojava  îşxal bikin.
Dibê Kurdistana başûr û hemû partiyên kurdan vê gefa Çavuşoglu sivik negrin, tirk di gefên xwe da cidî ne û dikin.
Tirk li hemberî kurdan kanin her tiştî, her dînîtiyê bikin.
Tiştê meriv ji Daîşê dipê, dibê meriv ji Tirkiyê jî bipê.
Her tiştê Daîş kani bike, Tirkiye jî kanebike û him jî bi zêdayî.
Başûr, rojava, PDK, PKK, PYD, YNK  qet ferq nake, ji bo tirkan hemû hêz û partiyên kurd neyar û yek in.
Ji xwe gelek derên başûr nuha di bin îşxala leşkerên tirk da ye.
Li başûr belkî li 10 ciyan kampên tîmên taybet û komandoyên tirk hene. Hemû jî tahlûke ne her tim kanin êrîşî kurdan bikin.
Lê ya trajîk hemû tîm û komandoyên tirk jî bi destê serok û hukûmeta Kurdistana Federe hatine bicîkirin.
Lê ewê tu carî bi rehetî dernekevin. Ji roja roj da ye ez viya dibêjim. Siaysetmedarê baweriya xwe bi dijminê xwe bîne û wî bibe li welatê xwe bi cî bike bi gotineke herî sivik ne tu siyasetmedar e, bi destê xwe gorra xwe û ya gelê xwe dikole.
Serokwezîrê Tirkiyê Bînalî Yildirim, wê rojê di telewîzyona NTVê da got, ew difikirin li li Kurdistana başûr jî li hemberî terorê herêmeke ewle pêk bînin û di vî warî da Tirkiye û hukûmeta Kurdistanê di eynî fikrê da ne.
Heger ev îdîa rast be felaketeke mezin e. Hêvî dikim vir be, îdîayeke bêbingeh be.
Lê tiştê bûye em nikanin vegerînin qeysa berê. Ya muhîm li hemberî vê tehdîda Tirkiyê em çi bikin û Kurdistana başûr çawa biparêzin?
Bi dîtina min:
1-Dibê hukûmeta Kurdistanû û hemû partiyên kurd van gef û tehdîdên Tirkiyê sist negrin û ji nuha da her tedbîrên leşkerî bigrin û li hemberî Tirkyê yekîtiya xwe nîşan bidin.
2- Dibê hukûmeta Kurdistanê û hemû partiyên kurd li ser van gef û tehdîdên Tirkiyê bi beyaneke mişterek nerazîbûna xwe nîşan nebidin...
3-Dibê hukûmeta Kurdistanê, serokên partiyan vê tehdîda Tirkiyê bi Emerîka û hêzên hevpeyman ra minaqaşe bikin û ji wan alîkariyê bixwzin.
4-Dibê hukûmeta Kurdistanê jî bi Bexdayê ra vekişîna leşkerên Tirkiyê bixwaze û destegê bide Bexdayê.
Belkî meriv kanibe hin tiştên din jî bike.
Lê ya muhîm dibê kurdên başûr li hemberî Tirkyê xwe sist nekin, tahlûke mezin e.
Ji bo Tirkiyê tu ferqa PDKê û PKKê tuneye, mesele prioritet(oncelik)yanî dor e, wext e, cî ye.
Tirkiye îro zêde bela xwe di PKKê dide, lê ev nayê wê manê sibe ewê eynî tiştî neyne serê PDKê.
Bi baweriya min bi qasî ku Tirkiye li hemberî PKKê û PYDê ye, hewqasî jî li dijî PDKê û Mesûd Barzanî ye.
Lê îro nikane bi hev ra êrîşî herduyan jî bike, vî îşî bi dor dike, nuha PKK ye, sibe PDK, YNK ye.
Çimkî tirk ne li dijî partiyan û serokan, li dijî doza kurd û Kurdistanê ne, li dijî avabûna dewleteke kurd in.
Ne li Tirkiyê tenê, li her derê li dij in.
Kî Kurdistanê bixwaze dewleta tirk li dij e, Erdogan, Yildirim û hukûmeta AKPê li dij e.
Ji bo tirkan şexs ne muhîm e, îdeolojî, daxwaz û hedef muhîm e.
Dibê kurdên başûr vê siyaseta tirkan tu carî ji bîr nekin, tu carî soz û ahdên wan baweriyê neynin.
Kî ji tirkan bawer bike, kî pişta xwe bispêre, Tirkiyê ya jî Îranê gorra xwe dikole.

Bêyî bakur li tu beşekî Kurdistanê kesê bi kurdî nizanibe nikane bibe nûner û serokê kurdan

Kekê Sînan Çîftyurek li gundekî Pazarciqê rastî pîreke berferatî, pîra Zelxê, pîreke xwe naskirî û kurdperwer hatiye û ew bi me daye naskirin.
Lê nivîs bi tirkî ye. Min jî çend gotin li ser siayseta bi tirkî got. Pîra Zelxê pîreke zana ye.  fermo him pîra Zelxê nas bikin û him jî rexneya min.
Kekê Sînan, min sohbeta te ya bi pîra Zelxê ra bi dilşadiyeke mezin xwend. Spas ji bo ku te pîra Zelxê, ev pîra xwedî hest û şiûra netewî, ev pîra dilbikul û zana bi me da nasîn.
Kekê Sînan, berê jî me carê li ser muhîmiya nivîsîna bi kurdî sohbeteke kin kiribû.
Bi baweriya min dibê êdî tu vê meselê yanî nivîsîna bi kurdî cidî bigrî û êdî bi kurdî binivîse.
Ne hewce ye ez ji te ra qala muhîmiya kurdî bikim, tu ji min baştir zanî siyasetmedarekî kurd, serokê partiyeke kurd dibê siyaseta kurd û Kurdistanê ne bi tirkî, bi kurdî bike.
Ma Mesûd Barzanî, Nêçîrvan Barzanî, Mele Bextiyar, Newşîrvan Mistefa bi erebî û Mistefa Hîcrî jî bi farisî siyasetê bikin rast e?
Û heger bibêjin em bi kurdî nizanin ya jî baş nizanin, lema jî em xebatên xwe bi erebî û farisî dikin, weşanên xwe bi erebî û farisî dikin, yanî gava bixwazin ew jî wek kurdên bakur bikin, gelo kurd ewê qebûl bikin?
Bêguman tiştekî wiha ne mimkûn e.
Û ji xwe siyasetmedarê bi kurdî nizanibe li başûr û rojhilat û heta li rojava jî nabe, nikane bibe serokê partyeke kurd, nikane bibe nûnerê kurdan.
Lê Kurdistana bakur dibe, mimkûn e û ji xwe yek du kes ne tê da hemû siyasetê bi zimanê tirkî dikin.
Ev tiştekî pir şaş e, her kes şaşiya wê qebûl dike, lê dîsajî dev jê bernadin.
Bêyî Tirkyê li tu beşekî Kurdistanê kesê bi kurdî nizanibe nikane bibe berpirsiyar û serokên partiyan, kes nikane bi erebî û farisî partiya xwe îdare bike.
Siaysetmedarê kurd, serokê kurd dibê bi kurdî bizane û siyasetê jî bi kurdî bike, bi endam û gelê xwe ra bi kurdî bide û bistîne, bi kurdî binivîse.
Ev felaket, yanî siyasetmedarên kurdînezan tenê li Kurdistana bakur tê qebûlkirin.
Bi baweriya min ev tiştekî ji kok da şaş e, siyasetmedar û serokên kurdan li Kurdistana bakur jî dibê siyasetê bi kurdî bike, partiya xwe bi kurdî îdare bike, bi kurdî binivîse. Heger bii kurdî nizanibe dibê fêr bibe. Fêr nebe dibê nebe berpirsiyr û serok…
Bi silavên dostaniyê

Sinan Çiftyürek Bo gotın u pişniyarı teyi baş zor spas. Ez Kurdi baş di xunım u di axifim lı beli bo nivisandını ger ez demak a dırıj vekatinim evji ji bo mın pır zore. Eme çareki bibinin

Emerîkayê got ewê qebûl nekin Tirkiye oksîjeneke nuh bide Daîşê!

Emerîkayê ji Tirkiyê ra got, ”Emê qebûl nekin hûn oksîjeneke nuh bidin Daîşê”!
Berdevkê Emerîka yê karên derve Kirby, li Sûriyê êrîşên Tirkiyê ser hêzên YPGê rexne kir û got, ”Em destegê nadin tu manawrayeke oksîjeneke nuh dide Daîşê û emê çavê xwe ji viya ra negrin.”
Ev çend roj in artêşa Tirkiyê bênabên li Efrînê û li bakurê Helebê li Marê kozikên/sengerên hêzên YPGê topbaran dike, bi balafiran gundên Efrînê bombebaran dike.
Li derên Daîş dişkê û mecbûrî paşdavekişînê dibe, artêşa tirk dikeve dewrê û êrîşî hêzên kurdan dike.
Bi îdîa ewê li hemberî Daîşê şer bikin ketin axa Sûriyê û Cerablûs û gelek derên din îşxal kirin.
Lê careke din derket ortê hedefa Tirkiyê ne Daîş e, kurd in, YPG ye. Her roj êrîşî gundên kurdan û kozikên YPGê dikin. Û heta nuha bi dehan însan kuştin.
Emerîka tim li dijî êrîşên Tirkiyê derketiye, lê ev cara pêşî ye bi zimanekî hewqasî vekirî û sert bala Tirkiyê dikşîne.
Di vê beyana xwe da Kirby ji Tiriyê ra dibêje bi van êrîşên ser YPGê hûn destegê didin Daîşê û bîna Daîşê fire dikin.
Reaksiyoneke pir baş e, êvî dikim netîceyekê bide.

24 oktober 2016

Li pişt êrîşa ser Kerkûkê Tirkiye derket

Li pişt êrîşa ser Kerkûkê Tirkiye derket. Daîşiyekî hatiye girtin gotiye "em bihelîkopterên Tikriyê hatin nava Kerkûkê."
Fermo, bira birêz Mesûd Barzanî û serokên kurdan bibînin dewleta tirk, Erdoganê dost û mitefikê wan, li Kerkûkê ji wan ra çi gorr kola bûn.
Lê dîsa şansê me heye êrîşkar bi ser neketin.
Ev cara duyem e tirk çeteyên xwe Yên Daîşê berra kurdan didin. Cara pêşî xwestin Hewlêrê bigrin.
Tu nemabû tirk bi nîv henekê Kerkûkê ji kurdan bigirin. Û dû ra jî ewê qetlîameke mezin bikirana û Kerkûk ji kurdn paqij bikirana.
Meriv ji dîroka xwe dersê negre, meriv dijminê bavan wek dostê lawan bibîne netîce ev e...
Serok û berpirsiyarên hukûmeta Kurdistanê dibêjin leşkerên tirk pêşmerge perwerde dike.
Carê şermeke mezin e meriv bibêje leşkerên tirk pêşmerge perwerde dike.
Leşkerên tirk bi xwe Daîş in.
Meriv Daîşê nake mamostê xwe yê leşkerî.
Kurdê, siyasetmedarê bi vî çavî li leşkerê tirk nenêre pir saf e...
Û her wisa safiyeke dûrî aqilan e meriv baweriya xwe bi dostiya dewleta tirk û bi hukûemta AKPê û Erdogan bîne.
Daîşiyên êrîşî Kerkûkê kirin sedîsed di kampên leşkerên tirk da, di kampa Selehedîn û yên nêzî Kerkûkê da hatin topkirin û perwerdekirin û dû ra jî bi helîkopteran birin danîn Kerkûkê.
Helîkopter di bin erdê ra nare, ji hewa dihere, çawa dibe kesî nedît?
Ya jî dîtin ji ber ku ya tirk bû saxî nekirin?
Yanî destik û îhmal sedîsed heye, bêyî îhmalê, bêyî destik êrîşeke bi 100 kesî ne mimkûn e.
Siyasetmedarê, kurdê bibêje me ev qeleşî, ev bêbextî ji Tirkiyê nedipa, bira dev ji siyasetê berde û ji xwe ra here karekî din bike...
Bi hevaltiya, bi baweriya bi Tirkiyê ra PDK û kurdên başûr bi agir dilîzin, gorra xwe û ya kurdan dikolin...
Bi vî halê xwe roja pêşî min got Tirkiye li pişt vê êrîşî ye.
Çimkî ez zanim tirk li dû çi ne.
Ji ber safî û xefleta wan tu nemabû tirk Kerkûkê ji destê wan derxin. Netîceya hevaltî û baweriya bi neyar ra ev e.
Lê berpirsiyarên PDKê, Tirkiyeya ku di esasê xwe da neyarê wan yê herî mezin e hîn jî dost û mitefikê xwe dibînin.
Hêvî dikim ev felaketa mezin ji wan ra bibe derseke dîrokî û êdî ji tirkan qut bibin.
Hevaltiya PDKê bi Tirkiyê ra hevaltiya bi mar ra ye. Meriv pir ne saf be baweriyê bi mar nayne....

Emerîka li ber kurdan digere ji bo ku hêzên xwe û dengê bikin yek


Nûnerê Emerîka yê li dijî Daîşê Brett McGurk, ji serokên YNKê ra jî got, yekîtiya xwe çêkin, dengê xwe bi yek in !
Wek tê zanîn di dîrokê da tu carî ji kurdan ra wiha li hev nehatiye, kurd tu carî hewqasî nêzî azadî û serxwebûnê nebûne.
Tu carî dinyayê, dewltên mezin hewqasî piştgirîya siyasî û eskerî nedaye kurdan.
Lê nuha ev hemû hene, şertên der û hundur kemilî ne û qada navneewî da jî ji kuran ra sempatî û piştgiriyeke pir mezin heye.
A di rojeke wiha da di nabêna partî û hêzên kurdan da yekîtiyeke netewî tuneye.
Bi taybetî jî di nabêna PDKê, PKKê, YNKê, Goran û PYDê da tunebûna hevkarî û yekîtiyeke netewî handîkapeke mezin e.
Gava ev hêzan yekîtiya xwe çêkin, partiyên din û yên Kurdistana rojhilat jî ewê bidin dû wan.
Lê ya muhîm yekîtiya partiyên xwedî hê in.
Dinya, Emerîka ji bêtifaqîya kurdan ne razî ye û her kes dixwwze kurd dev ji neyartiya hev berdin û ji bo serxwebûna Kurdistanê hêzên xwe û dengê xwe bikin yek.
A nûnerê Obama Brett McGurk, ev du roj in li Kurdistana başûr ji serokên kurdan ra viya dibêje, dibêje fersendeke tarîxî hatiye ber deriyê we, heger û hûn hêzên xwe û dengê xwe nekin yek, ev fersenda tarîxî ewê ji dest we here…
Kurd li hev nakin, li hev nayên, Emerîka ketiya nabêna wan, dixwaze wan li hev bîne, dixwaze li hemberî dijmin yekîtiya wan çêke.
Em şerm nakin û li ber xwe nakevin.
Dibê Emerîka ev şîret li serokên kurdan nekira, xwezî serokên kurdan xwe neanîna vî deraxî.
Lê wiha be jî hêvî dikim şîretên Brett McGurk serokên kurdan biaqil bike û kêfa dijminan bi xwe neynin…


XXX
Artêşa Tirkiyê êrîşî Efrînê û Kurdistana başûr kir
Di topbarana ser gundên Efrîndê da artêşa tirk 17 kes kuştin û di bombebarana do bi şev ya li nêzî Hewlêrê, li Şêrwan û Mêrgesorjî 3 kes hatin kuştin.
Tirkiye ji operasyon û serketinên pêşmerge û gerîla yên li hemberî Daîşê gelkî aciz e, lê nikane rawestîne.
Lema jî ji qahra ew jî êrîşî ser YPGê û li başûr jî gundên kurdan û hêzên pêşmerege bombebaran dikin.
Hukûmeta Kurdistana Federe û berpirsiyarên kurdan jî li hemberî van êrîşên Tirkiyê bêdeng in.
Bêdengiya berpirsiyarên hukûmeta Kurdistanê nayê qebûlkirin. Tirk xelkê swîl dikujin, dibê protesto bikin..
Serokwezîrê Tirkiyê Bînalî Yildirm ji alîkî da di telewîzyonan da dibêje Mesûd Barzanî mutefîkê me ye, têkiliyên me pê ra pir baş e, lê aliyê din jî bi balafirên xwe gundên kurdan dide bombebarankirin û sivîlan qetil dikin.
Dibê kurd bersîvekê bidin Tirkiyê.

Xwedêo tu dewletê bikî nesîbê me kurdan jî !

”Ya Rebî(Xwedêo) tu dewletê bikî nesîbê me kurdan jî ”!
”Îro li Washîngtonê cenazeyê kurdekî hebû; li goristanê ez jî beşdarî merasima definkirinê bûm.
Mele duayên xwe wiha qedand:
”Ya Rebî, tu dewletê bikî nesîbê me kurdan jî. Bike nesîb ji bo ku miriyên me li ser axa welatê xwe bi azadî razên.”
Ez ne merivekî bawermend im, lê belê gotinên mele yên dilê min ji çavên min herikand.”
///Mustefa Aram Acar

Heger hemû meleyên kurd wiha bigotana bi milyonan kurd nedibûn hevalên dijminê xwe. Hêvî dikim meleyên wiha di nava kurdan da roj bi roj zêde bibin.
Ji bo ku meriv bibe xwedî dewlet dibê meriv dewletê bixwaze, ji bo wê bixebite, ji bo wê dua bike, ji dinyayê bixwaze, ji Xwedê bixwaze.
Heta kurd nebin ji bindestiyê xelas nebin û xwedî dewlet zindîyên wan li dinyayê û miriyên wan jî di gorrê xwe da tu carî rehet nakin.

XXX

Nûnerê Taybet ê Obama Brett McGurk, li ser hevdîtinên xwe yên li Hewlêrê û bi birêz Mesûd Barzanî ra gotiye,
”Me li gel Serokê Herêma Kurdistanê Mesûd Barzanî çend civînên girîng û bi sûd pêk anîn, me behsa dabeşkirina Mûsilê li ser 8 nevçeyan kir.”
Li gorî medya kurdî dinivîse Brett McGurk, bi YNKê û grûbên din ra jî ewê hevdîtinan bike.
Bi qasî xuya dike kurd gav bi gav erdên xwe rizgar dikin û bi vî hawî di praktîkê da mada 140î bi cî tînin.
Bi kurtî li Îraqê û Kurdistanê tiştê muhîm dibin, munaqaşe û bazar li ser xerîteyên nuh tên kirin. Di vir da yekîtiya kurdan pir muhîm e. Hêvî dikim PDK, YNK û Goran hemû gelşên xwe yên siyasî, şexsî û hizbî bidin aliyekî û bi yekîtiyeke netewî derkevin hemberî dijminên xwe û bi tifaq li dora masê rûnin.
Ya na miletê kurd ewê zirareke mezin bibîne.

23 oktober 2016

Erdogan hevaltiya Tirkiyê ya bi El Nusra ra îtîraf kir


Pûtîn di telefonê da ji Erdogan xwestiye ew El Nusrayê ji Helebê derxin û Erdogan jî pêşniyara Pûtîn   kiriye û ji bo bicîanîna vê daxwaza Pûtîn emir daye hevalên xwe
Serokê Tirkiyê Erdogan ya ji ber nezaniya xwe ya jî ji ber stûriya xwe, hevkariya Tirkiyê ya bi El Nusrayê ra qebûl kiriye û gotiye:
”Do êvarî ez bi Pûtîn ra mesela Helebê peyivîm. Got piştî saet 22a ewê bomberdûmanê rawestînin. Ji bo ku El Nusra Helebê biterikîne ricayeke Pûtîn ji min bû. Min tiştê pêwîst tewsiyeyî hevalan kir. Li ser derketina ji Helebê me li hev kir.”
Îtîrafek, qebûlkirineke ji viya vekirîtir nabe.
Mêrik di 18ê mehê da telefonî Pûtîn kiriye, ji Pûtîn xwestiye balafirên Rûsyayê li Helebê li El Nusrayê nexin, dev ji bombebaranê berdin.
Pûtîn jî ev daxwaza wî qebûl kiriye.
Lê Pûtîn jî xwestiye Tirkiye El Nusrayê ji Helebê derxe û Erdogan jî ev ”rica” Pûtîn qebûl kiriye. Û ji bo bicîanîna vê daxwaza Pûtîn jî emir daye hevalên xwe, gotiye El Nusrayê ji Helbê derxin…
Ma îtîrafeke ji viya vekirîtir dibe?
Mêrik eşkere gotiye Pûtîn ji min xwest em El Nusrayê ji Helebê paş da vekşînin û min jî bo vê yekê emir da hevalan…
Ev, îtîrafa hevkariya bi hêzên terorîst ra ye. Çimkî El Nusra jî wek Daîşê ji alî Neteweyên Yekbûyî, Emerîka û Ewrûpayê ve wek rêxistineke terorîst hatiye îlankirin.

XXX
Dibêjin musîbeteke ji hezar nesîhetê baştir e, di her şerê da xêrek heye.
Belkî êrîşên Daîşê û neyartiya tirkan ya dûrî aqilan hestê yekîtiyê û kurdayetiyê bi kurdan ra xurt bike û wan bibe serxwebûnê.

XXX
Nûnerê Taybet ê Obama Brett McGurk, li ser hevdîtinên xwe yên li Hewlêrê û bi Serok Barzanî ra gotiye,
”Me li gel Serokê Herêma Kurdistanê Mesûd Barzanî çend civînên girîng û bi sûd pêk anîn, me behsa dabeşkirina Mûsilê li ser 8 nevçeyan kir.”
Li gorî medya kurdî dinivîse Brett McGurk, bi YNKê û grûbên din ra jî ewê hevdîtinan bike.
Bi qasî xuya dike kurd gav bi gav erdên xwe rizgar dikin û bi vî hawî di praktîkê da mada 140î bi cî tînin.
Bi kurtî li Îraqê û Kurdistanê tiştê muhîm dibin, munaqaşe û bazar li ser xerîteyên nuh tên kirin. Di vir da yekîtiya kurdan pir muhîm e. Hêvî dikim PDK, YNK û Goran hemû gelşên xwe yên siyasî, şexsî û hizbî bidin aliyekî û bi yekîtiyeke netewî derkevin hemberî dijminên xwe û bi tifaq li dora masê rûnin.
Ya na miletê kurd ewê zirareke mezin bibîne.

Erdogan neyartiya xwe ya bi kurdan ra venaşêre


Xwediyê Tirkiyê, bavê tirkan yê nuh serokkomar Erdogan, do dîsa gotiye,
”ewê tu carî nehêlin li ser sînorê başûrê Tirkiyê herêmeke terorê ava bibe.”
Û ”Operasyona Cerablusê û girtina Dabiqê jî nîşan dide ku Enqere di vê siyaseta xwe da bi israr e.”
Erdogan li ser îşxala Babê jî gotiye:
“Nuha ji me ra dibêjin derbasî nav El-Babê nebin, lê em neçarin derbas bin. Em neçar in herêmê ji terorê paqij bikin.”
Wek hûn dibînin, gava îdara herêmê dikeve destê kurdan, dibe ”herêma terorê…”
Gava herêm, Kurdistana rojava di bin destê rejîma Esed da bû ne herêmeke terorê bû.
Dû ra gava hin der ketin bin destê Daîşê dîsa ne herêma terorê bû.
Du salan bi Daîşê ra cîrantiyeke pir baş derbas kirin, elektirîk dan Daîşê. Tîcareta wan bi Daîşê ra pir baş bû.
Lê roja kurdan terorîstên Daîşê ji welatê xwe derxistin, wek meriv pê li dêla kûçik ke, bahjînî bi Tirkiyê ket û got desthilata kurdan teror e, em qebûl nakin li ser sînorê me ”korîdoreke terorê ava bibe”!
Yanî desthilata Esed, Daîşê xweş e, normal e, lê ya kurdan teror e.
Neyartiyeke ji viya mezintir nabe.
Mêrik îktîdar û cîrantiya her kesî, heta ya Daîşê jî pê wek şîr û şekir e, tenê ya kurdan qebûl nake, tenê ji desthilata, ji dewleta, ji îktîdara kurdan ra dibêje ”herêma terorê”!
Serfermandarê terorîstên herî wahş, ji kurdên li hemberî van terorîstan şer dikin ra dibêje ”terorîst”!
Û hin kurd hîn jî hevaltiya Erdogan, AKPê û vê îktîdarê dikin.
Hîn jî tamereke namûs û xîretê di yekî jî hilnayê û ji Erdogan û Bînalî Yildirim ra nabêjin, lawo çima hûn hewqasî neyartiya kurdan dikin, hûn ji kurdan çi dixwazin?
Esas Erdogan ji cahşên kurd vê cesaretê digre û van gotina dike.
Heger cahşên kurd dev ji cahşîtiyê berdin û vê zulma Erdogan qebûl nekin, Erdogan nikane wiha bike.
Ji ber ku cahşên kurd dengê xwe nakin, Erdogan jî bêtir bêperwa dibe û bêtir neyartiya kurdan dike.
Sebebê vê yekê bêdengî û piştgiriya cahşên kurd e, ew jî piştgiriya vê siyaseta Erdogan dikin, ew jî naxwazin kurd bibin xwedî dewlet, ew jî ji kantonên kurdan û jî ji herêmên rizgarkirî ra dibêjin ”korîdora terorê…”
Lema jî dibê kurd van cahşan jî nas bikin…


Ji bo ku bêmejuyên wek we fêm bikin


Mêrik li salonê rojname dixwend. Xebereke li ser jin û mêran bala wî kişand. Xanima wî li mitbaxê şîv çê dikir. Ban xanimê kir, got:
- Hela zû were, bala xwe bidê rojnamê çi nivîsî ye?
Jinikê dest ji karê xwe berda û çû.
-Çi nivîsî ye?
- Dibêje jin rojê 14 hezar cumle û mêr jî 7 hezar cumle bi kar tînin. Tu dibînî ilim jî îspat kiriye jin çiqasî geveze ne.
Jinikê got:
-Rast e, ji bo ku bêmejuyên/bêaqilên wek we fêm bikin,
em her gotinê dubare dikin.

XXX
Wezîrê karên derve yê Tirkiyê Çavuşoğlu gotiye, ”ewê destûrê nedin PKK têkeve Kerkûkê.”
Ev îşareta tiliya Tirkiyê di êrîşa Kerkûkê da heye.
Li Sûriyê jî eynî hincet nîşan dan û dest bi îşxalê û êrîşên ser YPGê kirin.
PKK tunebe jî Tirkiye ewê qulpeke din bibîne. Ewê dîsa tirkmenan bike bahane. Yanî ji bo ku bela xwe ji kurdan veneke ewê tu carî dawiya baneyên tirkan neyê.
Çimkî Tirkiye dixwaze Kerkûk û Mûsil nekevin destê kurdan, kurd nebin xwedî dewlet.
2016-10-22

XXX
Alim û dîndarên îslamê yên ji her çar beşên Kurdistanê do li Diyarbekrê di kongreyekê civiyan.
Amadekarên kongreyê ji Rûdawê ra gotine ew dixwazin dîndarên kurd bi hev bidin nasîn û yekitiyekê çê bikin.
Yek ji xalên esasî yê kongrê, di dînê îslamê da mafê neteweya kurd e û êrîşên Daîşê ser kurda ye.
Civîna alim û dîndarên kurd di demeke wiha da gaveke pozîtîf e. Di van rojên giran da, li hemberî êrîşên Daîşê û Tirkiyê dibê ew jî dengê xwe bilind bikin û wezîfeya xwe ya netewî, dînî û exlaqî bînin cî.
Kongreya Yekitiya Alim û Medreseyan a li Bakur ewê du rojan bajo.
2016-10-22


XXX
Ya kurd ewê li her derê teslîmî tirkan bibin ya jî li her derê ewê zora wan bibin.
Tirk bêyî viya tu alternatîfeke din qebûl nakin.

22 oktober 2016

Di herdu êrîşan da jî tiliya Tirkiyê heye



Êrîşa Daîşê ser Kerkûkê ya do êrîşeke pir mezn e, plana girtina bajarê Kerkûkê ye.
Di eynî rojê da balafireke şer ya kes nizane balafira kê ye, li Kerkûkê li Germiyan hin der û dor bombebaran kiriye.
Di êrîşê da 3 pêşmerge şehîd ketine û gelek jî birîndar bûne.
Erdogan çend roj berê got heger nehêlin Tirkiye beşdarî operasyona Mûsilê bibe, ewê plana xwe ya B û ya C têxin dewrê.
Wê rojê jî min min got û nuha jî dibêjim, plana Erdogan ya B êrîşî ser hêzên YPGê û plana C jî êrîşî ser kurdên başûr û ser pêşmerge ye.
Lema jî di êrîşa balafirê da jî û di ya nava Kerkûkê da jî tiliya Tikriyê heye, balafir ya Tirkiyê ye.
Erdogan êdî vekirî Kerkûkê û Mûsilê paş da dixwaze, dibêje berê vana bajarên me bûn.
Dibê kurd van beyanên Erdogan bi henek negrin, Erdogan li dû hin erdê din e.
Lema jî bêyî Tirkiyê kes hêzên pêşmerge û herêma Germiyan bombebaran nake.
Ji xwe qumandarê cepjeya Kerkûkê Westa Resûl jî do di Radionawa da edres Tirkiye nîşan daye, gotiye şikan wan Tirkiye ye.
Di êrîşa ser nava Kerkûkê da jî bi îhtîmaleke mezin tiliye Tirkiyê heye, terorîstan ji tirkmen û erebên zilamên Tirkiyê alîkarî girtine...
Bêyî destik û alîkarî êrîşeke hewqasî mezin ne mimkûn e. Ne Tirkiye tenê, Îraq jî ji bo ku kurdan ji Kerkûkê derxe li fersendtekê digere. Yanî kane iliya Bexdayê jî bi hawakî di vê êrîşê da hebe. Dibê kurd li ser hemû îhtîlan rawestin.
Tirkiye ji nuha û pê da ewê êrîşên wiha bide kirin. Çimkî li Mûsilê, li Sûriyê cî li Daîşê teng dibe, Daîş gav bi gav tê paqijkirin, serketina li Îraqê pir nêz e.
Têkçûna Daîşê plan û hesabên Tirkiyê yên li Sûriyê û li Îraqê serobinî hev dike. Lema jî wek Erdogan got, ewê plana B û C têxin dewrê.
Û ew jî êrîşên wiha ne, ewê bi Daîşê întîxarên wiha bidin kirin û bixwazin bi vê rêyê daxwazên xwe bi Emerîka û bi Îraqê bidin qebûlkirin.

Tirkiye her ku diçe tahlûketir dibe

Berpirsiyarên Tirkiyê bi xwe li ser rêya şaş in, lê gav û saetê rêya rast rê xelkê didin.
Berpirsiyarên Tirkiyê bi xwe zorba, zalim û zulimkar in, lê gav û saetê ji xelkê ra qala edaletê, qala heq û huqûq dikin.
Berpirsiyarên Tirkiyê seranserê Tirkiyê û Kurdistanê kirine zindan, rojê çend sed kesî davêjin bin kilîtî û ew jî li ber vê zindana mezin bûne qerdiyan, lê gav û saetê ji xelkê ra qala başiya azadiyê û demokrasiyê dikin.
Dîktator mecbûr in demagog û virek bin.

XXX
Êrîşa Daîşê ya ser Kerkûkê careke din nîşan da çavkaniya Daîşê ereb in. Heta ereb li Kurdistanê di nava kurdan da bin êrîşên wiha ewê dom bikin.
Pir ne dûr e tiliya Tirkiyê jî di vê êrîşê da hebe. Dibê kurd li ser vê îhtîmalê jî cidî rawestin.
Ji ber ku ereb wan şarge dikin û dû ra bera ser kurdna didin. 600 hezar koçberên ereb nuha li Kerkûkê hatine bicîkirin.
Êrîşa Daîşê ya îro êrîşa erebên Kerkûkê ye, polîsên Kerkûkê jî wisa dibêje.

XXX
Kurdê ji navê pêşmerge, ji serketina pêşmerge ya li hemberî dijmin ya jî ji serketina gerîla aciz bibe ew şîrheram e, namerd e, ji dê û bavekî kurd be jî hevalê neyar e û dijminê miletê kurd e.

XXX
”Dîroka Swêd-Rastiya tazî” !
Min, xanimê û lawikê me yê biçûk Rojan, îşev li Skandiascenen li şova komedîyenê kurd yê bi nav û deng Ozz Nujen û hevalê wî Mans Moller temaşe kir û du saetên bêemsal, mişt kêf û henek borand.
”Dîroka Swêd-Rastiya tazî”, şoveke mukemel bû. Dîroka Swêd, koçberî, mahcirî û gelek gelşên di nabêna xerîban û swêdiyan da bi mîzaheke mukemel raxistin ber çavên temaşevanan û her kes bi xwe û bi pêşhukmiyên xwe keniya.
Ozz Nûjen, wek her tim îşev jî li sahnê gelkî serketî bû û lema jî her cara gotin digirt dawiya çepikan nedihat. Temaşevanan nedixwest dawî li espriyên xwe yên harîqe bîne.
Di gelek espriyên xwe da rewşa gelê xwe, zulma li gelê wî dibe û îşxala Kurdistanê jî bi numûne û mîzaheke gelkî xweş şirove kir û sempetiya temaşevanan girt.
Li salona 800 kesî ciyekî vala jî tunebû. Me nedît du saet çawa derabs bû.
Me şeveke pir xweş derbas kir. Wek kurd em kêfxweş û serbilind ji salonê derkitin.
Kurdên Stockholmê, heger hûn dixwazin şeveke xweş derbas bikin, herin ”Dîroka Swêd-Rastiya tazî” temaşe bikin…


21 oktober 2016

Tirkiye dîsa heyfa Daîşê ji YPGê digre


Tirkiye heyfa Daîşê dîsa ji kurdan digre, li Sûriyê bi balafiran gundên kurdan û sengerên hêzên YPGê bombebaan dike.
Ji ber ku nikane ji koalîsyona navnetewî ra bibêje li Daîşê nexin, ew çekdarên min in.
Bi van êrîşên ser YPGê ji hêzên navnetewî ra dibêje ”Daîşê zêde neêşînin, heger hûn pir pêş da herin, ezê jî li kurdan xim û heyfa zilmên xwe ji kurdan bigrim.”
Ji ber ku nikane viya eşkere bibêje û rê li ber têkçûna Daîşê bigre, îcar ji hêrsa êrîşî kurdan û hêzên YPGê dike, dibêje li ku terorîst hebe emê lêdin.
Lê heta nuha ne wan çeteyekî Daîşê kuştiye û ne jî Daîşê leşkerekî tirk.
Daîş ev du sal in cîranê wan e, Dîlok(Entab), Ruha bûye şargehên Daîşê, rojekê aciya xwe nîşan nedan.
Hebe bi derewan be jî rojekê negotin me 200 çeteyên Daîşê kuştine. Çimî bi derewan be jî naxwazin derewekê di heqê Daîşê da belav bikin.
Wek mitefik li Sûriyê bi Daîşê ra li hin ciyan nubet guhertin, derên heta nuha xwedêgiravî di bin îşxala Daîşê da bû, nuha dibêjin me ji Daîşê girt.
Ya rast do jî di bin îşxala-TirkiyêDaîşê da bû û îro jî. Kînga çi nav hewce be wî navî lê dikin.
Heta nuha kesî ji Daîşê bihostek erd jî bi rehetî nestendiye. Lê Tirk distînin, hema gava berê xwe didin herêmên di bin îşxala Daîşê da, Daîşî tavilê dibin tajî û ji wir baz didin.
Helebet ev komediyeke pir erzan e, Emerîka jî, Rûsya jî û dinya jî zane Daîş hêzeke Tirkiyê ye û bi emir û fermanên Tirkiyê hereket dike.
Tirkiye carnan Daîşê dide pêş û gava ew têrê neke, îcar ew bi xwe, bi leşkerên xwe dikeve dewrê.
Çîrok ev e, rastî ev e…
Hêzên kurd, çawa ku li Kurdistana başûr li dij in Tirkiye êrîşî ser pêşmerge bike, dibê li rojava jî eynî şêlê bigrin.
Dewleta tirk li kîjan beşê Kurdistanê, êrîşî kîjan hêza kurd bike, dibê meriv li dij derkeve. Çimkî ji bo Tirkiyê ne hêz, kurd hedef in, ew li her derê êrîşî kurdan û berjewendiyên kurdan dikin.
Li Sûriyê jî dijminatiya wan ne bi PYD û YPGê ra ye, bi kurdan ra ye, bi pêşeroja miletê kurd ra ye. Dixwazin kurd li Sûriyê nebin xwedî dewlet, xwedî statuyeke siyasî.
Mesele ev e.
Li Îraqê û Mûsilê jî şerê wan, mudaxeleya wan ji bo vê yekê ye, dixwazin pêşiyê li Kurdistana yekbûyî bigrin.

XXX

Dewlet a tirka ye.
Meclîs a tirka ye.
Artêş a tirka ye.
Polîs a tirka ye.
Al a tirka ye.
Welat ê tirka ye.
Xwendeg, zanîngeh ên tirkan e.
Û tirk dîsa jî dixwazin kurd ji dewleta wan, ji ala wan, ji artêşa wan hez bikin.
Kurdê ji dewleta tirk hez bike merivekî totikvla û bêxîret e. Ya rast dibê em kurd jî dewletê, alê, artêşê, meclîsê, yanî yê tirkan çi heye, em jî wiya bixwazin.
Yê nexwaze xulamtî û koletiya tirkan qebûl dike.

20 oktober 2016

Bi êrîşa ser YPGê û kurdan Tirkiyê plana xwe ya B xist praktîkê


Ji do da ye balafirên Tirkiyê li Efrînê û li bakurê Helebê gundên kurdan û hêzên YPGê bombebaran dikin.
Medya tirk qala 200 kuştî dike. Lê vir e, li hemberî kurdan giranî dane şerê psîkolojîk.
Lê êrîş rast e û PYD jî êrîşî piştrast dike.
Erdogan di axaftina xwe ya do da gotibû ewê êrîşî ”terorîstan” bikin. Çend roj berê jî qala plana B û C kiribû.
Di nivîsa xwe ya do da û ya çend roj berê da jî min got plana B jî û ya C jî êrîşa ser kurda ye, ewê êrîşî YPGê û PKKê bikin.
Plana Erdogan ya B ev e, êrîşkirina ser hêzên YPGê ye.
Tirkiye ewê van êrîşên xwe bidomîne.
Ji ber ku ji Rûsyayê destûr girtiye.
Bêyî destûra Rûsyayê ne mimkûn e biwêribe bi balafiran derbasî Sûriyê bikin û li hêzên kurdan xin.
Di vir da ”okej”a Sûriyê jî heye.
Rûs ev ne cara pêşî ye bi kurdan ra bêbextiyê dikin.
Ji serîhildana Şêx Seîd bigre, heta bi Komara Kurdistana Rojhilat(Mahabadê)gelek caran bi kurdan ra qeleşî û bêbextiyên wiha kirina.
Rûsya dewleteke pir bêbext e. Bi taybetî ji bo me kurdan xwedî sicîleke qirêj e…
Di dema Sovyetê da jî kurd firotin kemalîstan û hemû daxwazên kemalîstan yek bi yek xistin praktîkê.
Kurd li ser daxwaza Tirkiyê di şefekê da ji cî û warên wan rakirin û surgûnî Asya Navîn, çolên Kirgisîstanê, Ozbekîstanê, Tacîkîsta û Tirkmenîstanê kirin.
Li ser daxwaza kemalîstan Elîfbeya Latînî li kurdan yasax kirin.
Û nuha jî li Sûriyê ûjdanê xwe, bextê xwe difroşin tirkan û dîsa bi kurdan ji tirkan ra davêjin erdê.
Li hemberî van êrîşên Tirkiyê şêla Emerîka ewê çi be ez nizanim. Lê het anuha Emerîka tim Tirkiye frên kiriye. Li hemberî van êrîşan ewê çi bike û reaksiyoneke çawa nîşan bide di rojên pêş da ewê diyar bibe.
Lê heger di êrîşên xwe da bi israr bin ez bawer nakim Emerîka kanibe Tirkiyê bisekinîne. Tirştê herî baş alîkariyê bide kurdan.
Wek min got ev êrîşa ser hêzên YPGê plana Erdogan ya B ye.
Lê plana Ce jî heye.
Plana C jî ez dibêjim bi êrîşên ser Qendîlê ra, êrîşa ser gundên kurdên başûr û ser hêzên pêşmerge ye.
Yanî pir ne dûr e Tirkiye bi bahaneyekê, bi balafiran hêzên pêşmerge jî bombebaran bike.
Axir ji bo ku nehêlin kurd li Mûsilê bibin xwedî desthilat û serxwebûna xwe îlan nekin , ji bo ku kurdan zeîv bixin û daxwazên xwe bi Emerîkayê bidin qebûlkirin ewê her rêyê biceribînin, her dînîtiyê bikin.

XXX
Xwarina tûj şîrîn e, gotina tûj birîn e.
Lê hinek kes jî gotina tûj heq dikin, ji bo ku di dilê wan da bibe birîn.

XXX

Kurdê hîn jî bibêje Tirkiyê li hemberî kurdan piştgiriya Daîşê nekiriye kurdekî cahş e, neyarê qewmê xwe ye.

19 oktober 2016

Erdogan dîsa got min berdin !


Xwediyê Tirkiyê û bavê miletê tirk yê nuh Recep Tayyip Erdogan , di civîna xwe ya muxtaran ya 28a da îro dîsa guriya ye, dîsa agir bera erdê daye, dîsa her kes bêminet kiriye, dîsa gotina dawî ji Îraqê û  ji Emerîkayê ra gotiye, dîsa gotiye, ”li qusê nenêrin, ezê têkevim Îraqê û kes nikane min bigre” û gelek fortên din dane xwe…
Ji muxtaran ra gotiye, ”Ez li vir, li huzûra we îlan dikim, êdî emê herin ser meselan. Êdî emê li bende êrîşkirina terorîstan nemînin. Ev rêxistin li ku bin, li ku xwe veşartibin, emê herin li wir li hustuyê wan siwar bin…”
Wel wel, wel…
Berde binê te erd e…
Weleh tu çi gefan li kurdan bixwe jî, çi fortan bidî xwe jî kurd ji te natirsin. Hema çi ji destê te û dewleta te tê qet texîr nekin.
Û ji xwe jî hûn nakin…
Lê ev gotina Erdogan tê maneye ewê li Kurdistana başûr êrîşî PKKê û li rojava jî êrîşî PYDê bikin.
Bêminet in, bira bikin.
Ji xwe ev 33 sal in êrîş dikin.
Qe Planên wî B û C ev in…
Gava wan êrîş kir kurd jî ewê li ber xwe bidin.
Wekî din tu rê tuneye.
Çimkî îro dewleta tirk hebûna xwe bi tunebûna kurdan ve girê daye.
Erdogan dibêje ji bo dewleta tirk bijî, dibê li vê dinyayê kurd nemînin.
Û ji xwe ev îdeolojia dewleta tirk ya resmî ye, ev îdeolojiya kemalîst a antî-kurd e.
Her hukûmet wek dîn, wek Xwedê îmanê bi vê îdeolojiya irqçî û ant-kurd tîne. Yanî ne tiştekî nuh e.
Lema jî li her derê, li başûr, li bakur, li rojava, li her derê tenê kurdan neyarên xwe dibînin û êrîşî kurdan dikin.
Îro li Tirkiyê ne meclîs heye, ne jî hukûmet.
Ne serokwezîr heye, ne jî wezîr.
Her kes li devê yek merivî dinêre, ew çi bibêje her kes dibêje “ewet efendim”, ser seran efendim..
Her kes di bin emrê Erdogan da ye.
Kes newêre dengê xwe bike, kes newêre bibêje êdî bes, te em ji guhan kirin…
Her roj çend civînan çê dike.
Her roj bi saetan dipeyive.
Hemû telewîzyon axaftinên wî zindî belav dikin.
Êdî efendî naçe deran, qey pê ra nagihîne.
Her kesî dibe ber nigê xwe û bi saetan şîretan li xelkê dike, dunyayê bêminet dike.
Bûye kûpê êqil, hema aqil belav dike…
Bûye dîkê qoqo, ji her kesî meydanê dixwaze…
Ev zalima ne diweste, ne zimanê wî diwerime û ne jî dengê wî dikeve, dipeyive û dipeyive, bi saetan nutqên vala, beradayî dide…
Lê dinya êdî guh nadê, êdî kes qurişekî xwe jî di gotinên wî nade.
Kes cidî nagre…
Lema jî ez dibêjim xwedê kir ku Erdogan îro serokê Tirkiyê ye, bi xêra vê retorîka wî  ya irqçî, pan-turkîst, antî –Emerîakn û mezhebî Tirkiye ji dinyayê îzole kiriye.
Li derve her kes bi çavê hevalbendê Daîşê, fînansorê cîhatçiyan li Tirkiyê dibêre...
Ewrûpa êdî Erdogan wek dîktatorekî pir tahlûke, agresîv û hevalê Daîşê dizane û dibîne.
Ev yek li kara kurda ye, tabî heger kurd zanibin feydeyê jê bigrin.

Xwedê kir ku dînekî wek Erdogan îro serokê Tirkiyê ye



Li Îraqê dijayetiya li dijî Tirkiyê û bi taybetî jî li dijî Erdogan roj bi roj berfireh dibe.
Hevalbendên tevgera Sadir li ser banga Mûqteda el-Sadir, do li ber avahiya sefareta Tirkiyê ya Bexdayê civiyan û Tirkiye û Erdogan bi şîarên pir giran protesto kirin. Gotin Tirkiye ”dagirker e û hevakrê Daîşê ye, xwediyê Daîşê Tirkiye ye”
Medyaya tirk heta nuha qet qala vê protestoyê nekiriye. Lê halbû xwepêşanderan li ber sefareta Îraqê ji Tirkiyê û ji Erdogan ra gotinên pir giran kirin.
Tirk vê muxalefeta li hemberî Tirkiyê û Erdogan vedişêrin, naxwazin haya civatê jê çê bibe.
Tirkiye ji bo ku wetoya li ser xwe rake û ew jî xwe têxe nava operasyona Mûsilê hezar dek û dolabê digerîne, heyeta dişîne Îraqê, Erdogan telefonî Pûtîn dike, filan û bîvan…
Eynî xweê ketiye wan, lê dikin nakin dewla wan bi avê nakeve, ne Bexda û ne jî Emerîka rû nade wan.
Çimkî her kes dibîne nêta wan xerab e û ne merivên baweriyîê ne, ji nuha da Erdogan qala ”Mîsaqî Milî” dike.
Yanî dibêje Mûsil ya me ya, heqê meli ser heye.
Û helbet ”Mîsaqî Mîllî” ya tirkan ne Mûsilê tenê, Cerablûsê, Silêmaniyê, Kerkûkê û gelek herêmên din jî digre nava.
Yanî bi kinî Erdogan dixwaze Împaratoriya Osmanî ji nuh ve ava bike, mêrik li dû wê ye.
Lê tirk hesabekî pir şaş dikin, ev îdeolojiya pan-turkîst û Erdogan ewê belayeke mezin bîne serê wan.
Xwedê kir ku Erdogan îro serokê Tirkiyê ye, bi xêra retorîka wî ya a-polîtîk, irqçî, pan-turkîst û mezhebî Tirkiye ji dinyayê îzole kir. Ev eyk li kara kurda ye, tabî heger kurd zanibin jê feydeyê bigrin.

Kurdan sînorên neyaran danîne rakirine


Cenazeyê Fermandarê Pêşmerge Servet Abîşka(Berxwedan Mêrdînî), du roj berê li Mûsilê di şerê li hemberî Daîşê da şehîd ket. Serwet Abîşka, li Qosera qeza Mêrdînê ji aliyê malbata wî ve bi merasimeke mezin hate pêşwazîkirin.
Kurd êdî sînorê sûnî nas nakin. Pêşmergeyên Kurdistana bakur, başûr û rojhilat, li başûr bi birayên xwe ra di yek sengerê da mil bi mil ji bo Kurdistaneke azad li hemberî dijminên xwe şer dikin.
Kurd êdî sînorên neyaran danîne nas nakin. Ev pêşketineke tarîxî ye, nîşan û îspata xurtbûna hestên netewî ye. Îspata miletbûnê ye.
Piraniya kurdan êdî wek ferdên miletekî difikirin û ji bo yek hedefê, serxwebûna Kurdistanê dixebitin û canê xwe feda dikin.
Lê piraniya serokên kurdan hîn wiha nafikirin, halîhazir hedefeke wan ya wiha jî tuneye. Wek kurd dibê meriv tim vê armancê bi bîra wan xe.

XXX
Serpêhatî, tecrûbe ji bo siyasetmedaran, heger ji bîr nekin gelkî muhîm e.
Ebedî îro di tengasiyê da ye û ji bo bicîanîna madeya 140î û pêşeroja Kurdistanê kane gelek sozên devkî bide birêz Barzanî û kurdan.
Lê sibe ew û aliyê sunî kanin li hev bikin û herdu bi hev ra dîsa şerê kurdan bikin.
Kes nikane bibêje tiştekî wiha ne mimkûn e.
Tiştê meriv ji birêz Mesûd Barzanî dipê, dibê serpêhatî û tecrûbeyên xwe yên bi ereban ra tu carî ji bîr neke.
Hêvî dikim piştî rizgarbûna Mûsilê, kurd hemû hermên welatê xwe paş da bigrin û serxwebûna xwe îlan bikin.

XXX

Kosret Resûl sekreterê YNKê ye. Do lawê wî Şalaw birîndar bû.
Kurd, bi serok û zarokên serokên xwe ve di sengera şer da ne. Zafer ya wan e.

18 oktober 2016

Gava tirk dibînin nikanin bi kurdan dev li kevir û daran dikin

Gava berpirsiyarên Tirkiyê dibînin gotina kurdan ji ya wan bêtir pere dike xwe perçe dikin, porê xwe dirûçikînin.
Gava tirk dibînin çi dikin jî nikanin bi kurdan dev li kevir û daran dikin.
Lê ev jî pere nake. Tenê psîkolojiya wan xera dike.
Tirkiye ne di nava operasyona Mûsilê da ye.
Ev yek bi tirkan pir zor tê, wan dîn û har dike.
Gava berpirsiyarên Tirkiyê dibînin giraniya kurdan ji ya wan bêtir e, gotina kurdan ji ya wan bêtir pere dike xwe perçe dikin, porê xwe dirûçikînin.
Mucadele û diristiya kurdan ya bi mitefikên xwe ra sextekarî, fêlbazî û durûtiya tirkan derxist ortê û ew mat kirin.
Tirkiye ne ku dixwaze alîkariya Îraqê bike, dixwaze di parkirina Mûsilê ya pêşerojê da ew jî bêpar nemînin.
Û heger bikanibin dixwazin li Mûsilê rola kurdan û para kurdan jî kêm bikin.
Tirkiye bi çavê berateyê li Mûsilê dinêre.
Wek qijik dixwazin ew jî çend hestî û hinek hûrik mûrikên ji ber ber baz û şêran bi dest xin…
Berpirsiyarên Tirkiyê gav û saetê beyanên li dijî hev û vir didin, virên bi boçik û dezînformasyonê belav dikin.
Ji ber ku nêta Tirkiyê xerab e û li pey parkirineke nuh e Îraqê nehîşt Tirkiye tevî operasyonê bibe.
Emerîkayê jî piştgirî da Bexdayî û ji tirkên sextekar ra got li ciyê xwe rûnin.
Nuha tirk xwe pir bêçare his dikin. Di destê wan da tenê derew mane, gav û saetê beyanên vir belav dikin.
Bexda zane Îşxala Mûsilê plana Tirkiyê û Nuceyfî bû.
Nuha jî bi dîlbaziyeke mezin dixwazin xwe li dijî çeteyên xwe nîşan bidin.
Lê kes bi vê vira wan naxape, ereb zanin tirkan çi aniye serê wan û nuha jî li pey çi ne…
Heger li başûr serokên kurdan bi tifaq û jîr bin piştî azadkirina Mûsilê pozîsyona kurdan ewê gelkî xurtbibe û bingehê Kurdistana serbixwe jî gelkî saxlemtir.


Tirkiye bûye bela serê dinyayê


Tirk bela ne, ji roja hatine herêm tevlihev kirine û kirine gola xwînê. Erdogan jî wek mahcirekî Kafkasan naxwaze vê adeta, tradîsyona pêşşiyên xwe yên mahcir û panturkîst xera bike.
Enwerê mahcir jî çavê xwe berra erdê xelkê dabû û xwestibû Dewleta Osmanî hîn mezin bike.
Lê di sala 1922a da li Tacikîstanê bi ser bela xwe ve bû.
Erdoganê gurc jî ewê bela xwe bibîne.
Çimkî agir kiriydawa xwe.
Çimkî pir bilind difire.
Çimkî har bûye.
Çimkî pir bêûjdan û pir zalim bûye.
Çimkî ji hedê xwe zêde neyartiya miletekî wek kudan mezlûm dike. Dixwaze koka kurdan biqelîne.
Her zulmê, herbêbextiyê li kurdan dike.
Nahêle kurd li tu beşekî Kurdistanê ji bindestiyê xelas bibin û bigihîjin azadiya xwe.
Ev stûrê ewê ji Erdogan ra nemîne.
Bi alîkarî û mucadela kurdan heq ewê tecelî bike, neheq û zalim ewê bela xwe bibîne.
Tirk bi xêra dostiya bi kurdan ra li herêmê bi cî bûn, bûn xwedî desthilat.
Lê dû ra bi kurdan ra bêbextî kirin, gava xurt bûn, rabûn li hustiyê kurdan siwar hatin.
Gotin hûn tune ne, hûn tirk in.
Heta bigihîje zimanê kurdan jî yasax kirin.
Jenosîdeke bi riya asîmîlasyonê ji xwe ra kirin îdeolojiya dewletê.
Û nuha jî tirk dixwazin kurd li her welatî ya tim bindest bin, ya jî ji ortê werin rakirin.
Xwedê jî, xweza jî û kurd jî ewê tu carî vê bêbextî û zorbatiya tirkan qebûl neke.
Çawa ku bi saya dostiya bi kurdan ra tirk li herêmê bi cî bûn, bûn xwedî desthilat, wisa xuya ye ji ber dijminatiya bi kurdan ra jî ewê ji herêmê werin qewirandin.
Tam wexta qewitandina tirka ye, lê şansê wan heye xayinên kurdan pir in, bi deshhezaran kurd bûne neyarên qewmê xwe û zilamên tirkan.
Û li alîyekî din jî kurd hîn şîqaq û bêtifaq in.
Lê hêdî hîdî kurd ji vê dubendîtiyê û bêtifaqiyê aciz dibin û însan êdî li hemberî siyasetmedar û serokan diranan diqîrçînin…
Ewê baş bibe, ji ber ku ji bo Emerîka û Xerbê jî li herêmê alternatîfa kurdan tuneye.
Miletê herî demokrat û berî bi Ewrûpayê da kurd in.
25-30 salên dawî nîşan dan ereb, faris û tirk ne dîwarên saxlem in, ne civatên medenî ne, tu carî nabin mitefikên Emerîka û Xerbê yên demokrat, adil, sosyal û pêbawer.
Li herêmê tu milet bi qasî kurdan bi dil û can ne li pey demokrasiyê, wekheviyê û civateke adil û azad e.
Li herêmê tu milet bi qasî kurdan pluralîzmê, pirrengiyê naparêze.
Êdî hemû dinya viya dibîne.
Êdî Emerîka jî û her ewrûpî jî dibîne Tirkiye welatekî pir tahlûke ye, îdeolojiya tirkîtiyê ji faşîzmê û nazîzmê xerabtir e, tirk hemû cîhana xiristiyan neyarê xwe dibînin, bêyî xwe ji her kesî nefret dikin.
Tirkiye ji bo Ewrûpayê ewê tim bibe çackaniya gelşan.
Tirkiyeke xurt ewê tu carî rehetiyê nede Ewrûpayê.
Tirkiye eşkere Ewrûpayê tehdît dike, ji Ewrûpayê xûgê dixwaze. Dibêje heger hûn xûgê, xeraca ez dixwazim nedin, ezê bi milyonan koçberên feqîr rêkim ser we û hemû Ewrûpayê serobinî hev bikim.
Îro her welatê Ewrûpa xwe di bin tehdîda Tirkiyê da his dike û nizanin ewê çawa xwe ji vê bela tirkan xelas bikin.
Û ya din jî berdewamiya bindestiya kurdan li herêmê ewê tim û tim bibe sebebê bêîstîkrariyê, şer û tevliheviyên mezin.
Û netîceyên van şer û tevliheviyan digihîjin Ewrûpayê jî, Ewrûpa jî jê para xwe digre.
Lema jî ewrûpî û emerîkî êdî dibînin azadbûna kurdan di lehê wan da ye.


Li Tirkiyê diz mîr e, keleş wezîr e

Li vê dinyayê tiştê herî zêde min dilşa dike gava dewleta tirk li hemberî kurdan bêçare dimîne û agirqûnî dibe.
Di mesela Mûsilê da dewleta tirk eynî agirqûnî bûye, xwê ketiyê wan, dixwazin kurdan bixwin, lê Emerîka diranên wan kişandiye.

XXX
Li Tirkiyê diz mîr e, keleş wezîr e,
mirîşk kor e,
rûvî jî tuxtor e
û kêf kêfa wan e...

XXX
Karayilan gotiye, ”dijmin li hember me planan digerînin, çima em wek kurd nikanin werin ba hev. Ev şerm e.”
Hemû serokên kurdan dibêjin yekîtî şert e, gerek em hêzên xwe bikin yek.
Dibêjin lê naikin.
Wê demê ya ne dirist in ya jî ne bi serê xwe ne.

XXX
Seg gava bixwîne dibe segbav
Gelek segên me xwendin ji dêlî ku ji gelê xwe bibin
şûr û mertal
li ber deriyê dijmin bûn segbav.

XXX

Bi kinî meriv kane bibêje meriv tu texlît in,
hin melek in,
hin kelek in

17 oktober 2016

Hîn nêçîr nebûye li ser post ketine gewriya hev

Hin kurd ji nuha da dibêjin ew li dijî Kurdistaneke laîq(sekuler) in û hin kurd jî dibêjin ew li dijî Kurdistaneke îslamî ne.
Weleh ji bo min ya muhîm çêbûna Kurdistanê ye, kî çê dike bira çê ke, dixwaze bira komunîst ya jî îslamî çêkin, ji bo min qet ferq nake.
Kî Kurdistanê çê ke ezê piştgriya wan bikim.
Çimkî tu kes, tu îktîdar, tu rejîm ne ebedî ye. Swêd jî dema ava bû ne wiha bû, wan jî serî difirandin, pîrek dişewitandin û ne laîk bûn.
Kurdê bibêje heger Kurdistan laîk be ez naxwazim û yê laîk jî bibêje heger Kurdistan îslamî be ez nazwazim, bi baweriya min ew hîç Kurdistanekê jî naxwazin.
Hîn nêçîr nebûye kurdên me li ser postê nêçîrê li hev nakin, ketine gewriya hev.
XXX
Camêrekî gotiye, ”berê pera qezenc bike, qudret û îtîbar dû ra tê.”
Gelî biran, dibê berê em ji bindestiyê xelas bibin, wek xelk û almê bibin xwedî dewlet.
Demokrasî, şiklê û dûzana dewletê, civateke adil, wekhevî û gelek tiştên din dû ra tên…

XXX
Sebir hunerê hêvîkirinê ye.
Ji bo ku em ji bindestiya xelkê xelas bibin û bigihîjin azadiya xwe û wek cîranên xwe em jî bibin xwedî dewlet, me pir pa,
pir li ber xwe da,
pir can û mal da,
me bi qasî Hz. Eyûbê kurmaxwarî sebir kir.
Hêvî dikim êdî ew roj hatibe û hêzên me yekîtiya xwe çêkin û kurd jî bigihîjin mirazê xwe; yanî dewleta xwe ya netewî ava bikin.
Ji bo ku kurd wê rojê nebînin tirk bi rast û çepên xwe ve, bi faşîst û sosyaldemokrat û îslamiyên xwe ve xwe perçe dikin.
Hemû derdê wan kurd li başûr, li rojava nebin xwedî dewlet û Mûsil nebe ya kurdan.

Operasyona Mûsilê û pêşeroja kurdan

Operasyona Mûsilê dest pê kir. Di operasyonê da hêzên pêşmerge barekî mezin girtine ser milên xwe.
Di operasyonê da nebûna Tirkiyê û Heştî Vatena nêzî Tirkiyê û Heştî Şabîya nêzî Îranê tiştekî baş e.
Berî operasyonê bi çend rojan birêz Mesûd Barzanî çû Bexdayî û li ser operasyona Mûsilê û beşdarbûna hêzên pêşmerge li hev kirin.
Naveroka lihevkirinê çi ye, çi nîne ez bi xwe baş nizanim.
Lê meriv hêvî dike ku beşdariya hêzên pêşmerge ne ji bo alîkariya leşkerî tenê be, netîceyên wê yên siyasî jî hebin.
Li gorî tê gotin di çarçeweya madeya 140î da bi Bexdayê ra hatiye lihevkirin.
Yanî hemû herêmên minaqaşe li ser hene, piştî şer û rizgarbûna Mûsilê ewê bi Kurdistanê ve werin girêdan.
Û Mûsil jî ewê bi îdareyeke muşterek were îdarekirin.
Hêvî dikim ev agahî rast be û pêşmerege tenê ji bo alîkariyê neçûbe hawara Bexdayê, piştî rizgarkirina Mûsilê kurd di warê siyasî û da hin serketinan bi dest xin û bajar û herêmên heta nuha derî îdareya Kurdistanê mane, vegerînin ser Kurdistanê.
Bi hêviya zayiateke hindik û serketinên mezin ji bo pêşmergeyên me...

2016-10-116

16 oktober 2016

Pisporê me dibêje gerek Tirkiye jî para xwe ji Mûsilê bigre !


Yekî bi navê Mihemed Sabir, xwedêgiravê ”pisporê leşkerî” ye, di Rûdawê da dibêje, piştî rizgarkirinê, dibê Tirkiye jî li ser pêşeroja Mûsilê xwedî gotin be.
Ev kurdê pisporê leşkerî dibêje, ”bi kurdan, ereban û Amerîkayê ra gerek Tirkiye jî piştî rizgarkirina bajêr di siyaseta rêvebirina Mûsilê da rol bilîze.”
Bi Peymana Lozanê gava Kurdistan perçe kirin û Mûsil dan Îraqê, nufûsa kurdan ji ya ereb û tirkmenan bi hev ra zêdetir bû.
Nufûsa kurdan li dora 450 hezarî bû. Lê nuhfûsa ereb û tirkmenan bi hev ra hewqas tunebû. Nufûsa ereban 185 hezar û ya tirkan jî li dora 100-125 hezaran bû.
Lê Beasîyan di netîceya erebîzekirinê da demografiya Mûsilê guhertin û ereb zêde kirin, kurd ketin hindikayiyê.
Yanî Mûsila bajarê kurdan, kirin bajarekî ereban.
Îro jî ”pisporekî” kurd rabûye ji me ra dibêje, piştî rizgarkirina Mûsilê gerek Tirkiye jî bibe xwedî gotin.
Ê ji xwe tiştê tirk jî dixwazin ev e.
Ji ji xwe ji bo vê, Tirkiyê bi hezaran leşkerên xwe li Başîkê û li 10 ciyên Kurdistanê bi cîh kirine. Ji bo ku li ser pêşeroja Mûsilê bibin xwedî gotin û giraniya kurdan kêm bikin.
Lê kurdên me wa ye ji nuha da abûqatiya û propagandeya tirkan dikin, dixwazin ku Tirkiye jî para xwe ji Mûsilê bigre.
Yanî Tirkiyê wa ye jî nuha da di nava kurdan da merivên xwe çêkirine û bingehê xw xurt kirine.

XXX
Tirkiye dibêje Dabiq ji Daîşê girtiye.
Heger rast be, wek Cerablûsê, Dabiq jî ji çeteyên xwe dewr û teslîm girtine.
Dîsa bê şer û bi rehetî...
Wey agir bi derewên we keve, Daîşa 26 dewlet nikanin pê, gava dibêjin "tirk hatin", hemû dibin kelmêş û bi hewa dikevin...
Kuro dev ji van derewan berdin, Daîş hûn bi xwe ne, hemû jî zilam û çeteyên we ne...
Yanî li ortê tu girtin mirtin tuneye, nav guhertin, berê Daîş bû, nuha kirin leşkerên tirk.
Yanî eynî meriv in, eynî hêz e.
Tiyatroke pir erzan e lê dinya bênamûs e, dengê xwe nake.
Dîtin êdî bi Daîşê nabe, lema jî Erdogan bi xwe derbasî dîreksiyonê dibe.
Hedef perçekirina kurdan û Kurdistanê û tengkirina bingeha dewleta kurd ya pêşerojê ye.
Di nivîsa xwe ya do da min gotibû ewê tiyatroya Cerablûsê bilîzin...
Viya Plana Erdogan ya B ye, C jî hîn maye...

XXX
Kurd tenê li ser girtîmana meclîsê yekhelwest in !
Ji bo fêmkirina gelşa nabêna partiyên Kurdistana başûr nivîseke hêja ye. Arif Qurbanî dibêje, tenê di xalekê da di nabêna hemû partiyên di meclîsê da yekîtî heye, ew jî nexebitandina meclîsê ye.
Hemû partî, bi taybetî jî PDK wek hukûmet dixwaze meclîs nexebite û kes karê wan kontrol neke.
Bixwînin, nivîseke hêjayî xwendinê ye.


Tirkiyê çima çavê xwe berra Mûsilê daye?


Daxwaza tirkan ya girtina Mûsilê ne ya îro ye, ji berê da heye. Her cara li herêmê tevlihevî çê dibe tirk çavên xwe bera Mûsilê didin û dest bi minaqeşeyên paşdagirtina wê dikin.
Ji ber çi, çima tirk dixwazin Mûsilê bigrin?
Çima ne bajarekî din, çima Mûsil?
Bi kinî, tirk dibêjin ji ber ku Mûsil berê di nava sînorên dewleta Osmanî da bû, yanî wek Edenê ew jî bajarekî tirkan bû.
Lê bi Peymana Lozanê Îngilistanê bi zor ji me stend. Wê demê em zeîf bûn, me nikanîbû bi îngilîzan, lema jî me Mûsil da wan û Îraqê.
Lema jî ”mafekî me yê dîrokî” li ser Mûsilê heye.
Angorî vî mafê dîrokî Tirkiye îro kane Mûsilê ji Îraqê bixwaze ya jî îşxal bike.
Kêm zêde argumenta Tirkiyê ya li ser Mûsilê ev e, hebûna ”mafên dîrokî” !
Berê bajarê me bû…
Heger pîvan ev be, wê demê Atîna jî, Belgrad jî, Zagrep jî, Tîran jî, Sofya jî, Şam jî, Bexda jî, Trîpolî û gelek bajarên din jî wek Mûsilê demakê bajarên dewleta Osman bûn, di bin îşxala osmaniyan da bûn...
Çima Tirkiye van bajaran jî wek Mûsilê naxwaze?
Heger pîvan ”mafê tarîxî” be, dibê Tirkiye ne Mûsilê tenê, Bexdayê, Şamê, Tîranê û hemû bajarên dewleta Osmanê yên din jî bixwaze.
Çima Mûsil tenê?
Û Mûsil jî ne bajarê Mûsilê yê îro tenê ye, ji Silêmaniyê bigre heta bi Kerkûkê, Hewlêrê, Zaxo, Dihokê, yanî hemû Kurdistana başûr digre nava xwe.
Sebebê ku Tirkiye Tîran û Bexdayê naxwaze, lê Mûsilê dixwaze kurd in, Tirkiye her miletî, her welatî qebûl dike, tenê kurdan û Kurdistanê qebûl nake.
Ji bo ku di pêşerojê da Kurdistan çênebe û ya heye jî were perçekirin çavê xwe berdaye erdê kurdan.
Tirkiye dixwaze bingeha Kurdistanê, bingeha avabûna dewleteke kurd ji ortê rake, bi kêmanî pir teng û biçûk bike.
Sebeb ev e. Sebeb neyartiya miletê kurd e.
Û gava Erdogan, Bînalî Yildirim di meclîsê da dibêjin ji ber ku wan hîşt li başûr ”Bakurê Îraqê” çê bibe, wan şaşî kir, lê ”li Sûriyê ewê vê şaşiyê dubare nekin”, hemû çahş û bêxîretên kurdên di nava AKPê da ji wan ra li çepikan dixin, dibêjin her bijî !

XXX

Medyaya tirk bi derewan qala şerê Tirkiyê û Daîşê û êrîşa tirkan ser Dabiqê dike. Ne hewcî şer e, Erdogan kane bi yek emrî Daîşê ji Dabiqê derxe. Wek ku ji Cerablûsê derxistin. Li Cerablûsê jî fermandar Erdogan emir da û Daîş vekişiya.
Bêyî ku leşkerekî tirk were kuştin ya jî birîndar bibe, bêyî ku yek Daîşî were kuştin ya jî birîndar bibe, Tirkiyê Cerablûs girt.
Tirkiye eynî tiştî kane li Dabiqê û li her dera Sûriyê jî bike, ne hewceyî şer e, emrê Erdogan tenê têrê dike.
Belkî jî sibe, dusibe bibêjin me Dabiq ji Daîşê girt. Ev jî mimkûn e.
Çimkî bi Daîşûê êdî nikanin bigihîjin armanca xwe, Ji ber vê jî kanin Dabiqê ji çeteyên xwe dewr û teslîm bigrin.,
Lema jî şerê bi Daîşê ra vir e, lê plana îşxala Dabiqê rast e. Ji bo ku di nabêna kurdan da bendekê çêkin, nehêlin Efrîn û Kobanê bigihîjin hev.

15 oktober 2016

Çima Tirkiye hîn jî mitefikê Daîşê ye?


Medeyaya tirk dibêje leşkerên tirk li Sûriyê êrîşî Daîşê kirine û zirareke mezin dana Daîşê.
Bêguman ev vireke ji bo xapandina bîr û raya giştî ye, ji bo ku bi derewan xwe li dijî Daîşê nîşan bidin û bi zor tevî operasyona Mûsilê bibin.
Lema  derewên wiha belav dikin.
Tirkiye hîn jî mitefik û sponsorê Daîşê yê herî muhîm e.
Tirkiye êrîşî Daîşê nake û tu sebeb jî tuneye li dijî Daîşê be.
Lê gelek sebeb hene ku Tirkiye sponsorê Daîşê be.
Çima ne mimkûn e Tirkiye şerê Daîşê bike ?
Ji ber ku Tirkiye li dijî kê û dost û mitifekê ye, Daîş jî dijmin û mitifikê wan dewletan û wan hêzan e.
Ez çend numûneyan bidim.
Tirkiye şerê PYDê û YPGê dike.
Daîş şerê wan dike.
Tikiye li dijî PKKê ye.
Daîş jî li dijî PKKê ye.
Tirkiye li dij e ku kurd li Sûriyê ji bin destiyê xelas bibin û bibin xwedî dewlet.
Daîş li dij e û ji bo ku kurd li Sûriyê nebin xwedî maf şerekî giran li hemberî kurdn dike.
Tirkiye li dijî rejîma Esed e û dixwaze Esed bixwîne.
Daîş jî li dij e û bi alîkariya Tirkiyê şerê Esed dike.
Tirkiye li dijî Îranê û Îraqê ye.
Daîş jî li dijî Îranê û Îraqê ye û di du cepheyan da şerê wan dike.
Tirkiye li dijî şîiyan e.
Daîş jî şerê şîiyan dike.
Tirkiye dostê Suûdî  û Qeterê ye.
Daîş jî dostê wan e û bi alîkariya wan şerê kurdan û Esed û şîiyan dikin.
Tirkiye li dijî Emerîkayê ye, her roj siyaseta Emerîka ya herêmê rexne dike.
Daîşê li dijî Emerîka ye.
Bi kinî Tirkiye li dijî kê ye, şerê kê dike, Daîş jî li dij e û şerê wan dike.
Tirkiye dost û mitefikê kê ye, Daîş jî wek Tirkiyê dostê wan e û ji wan alîkaitiyê digre.
Îcar ji bo ku Tirkiye bi hêzeke wiha ra nebe mitefik dibê dîn be. Lema jî Tirkiye ne li dijî Daîşê ye, Daîş hêzeke mitefikê Tirkiyê ye û li gorî berjewendiyên Tirkiyê hereket dike.
Tirkiye ket Sûriyê ji bo ku Daîşê ji destê YPGê, ji îmhayê xelas bike û rê li pêşdeçûna kurdan bigre.
Yanî tiştê Daîşê bi şerê du salan nikanîbû bikira, Tirkiye nuha dixwaze bi Daîşê ra bike û Kurdistanê ji destê kurdan derxe.
Çeteyên Daîşê li Sûriyê nuha bi navên din bi Tirkiyê ra şerê kurdan dikin. Tirkiyê bi vê îşxala xwe ji Daîşê ra bû şemsiye.
XXX
PKK li Kurdistana başûr hebe jî tunebe jî Tirkiye xwediyê eynî siyaseta antî-kurd e. PKK tenê bahane ye.
Tirk ne li dijî PKKê ne, ew li dijî serxwebûna kurdan û çêbûna Kurdistanê ne. Ji viya ditirsin, dixwazin pêrgiyê li viya bigrin.
Erdogan û tirk her roj vê tirsa xwe û vê dijayetiya xwe dibêjin, eşkere dikin.
Ew dibêjin ewê nehêlin "Bakurê Sûriyê " çê bibe.
Yanî ew li dijî Kurdistana Federe ne jî û ewê nehêlin li Sûriyê jî eynî tişt çê bibe. Dibê em viya fêm bikin, bibînin.